VOV4.Sêdang - Hâi lơ 27/7, kong pơlê Dak Nông ai tơ’nôm 4 ngế tâ pơreăng a Dak Mil cho mâu ngế cheăng ngăn pơkeăng tro tâ COVID-19 xuân to mâu ngế ki F1 dêi ngế má 98.494. Mâu ki mê xuân to mâu ngế cheăng ngăn pơkeăng hdrối mê ai pơlât ngăn ngế ki tâ pơreăng má 98.494, ƀă xuân khăm ngăn mơheăm ƀă kih thuât Realtime RT-PCR, ăm hlo yương tĭnh ƀă vi rus SARS-CoV-2 a 10h 25’ hâi lơ 27/7. Klêi ăm ‘nâi hiăng yương tĭnh ƀă virus SARS-CoV-2, kơvâ ngăn pơkeăng rơtế ƀă mâu khu râ pơkuâ cheăng hiăng klâ krê ƀă ăm rơxế chơ mâu ngế ki mê ƀă rơxế hmâ chơ pơlât chơ kê̆n Hngêi pơkeăng pơtân kơxô̆ 1 (cho hngêi pơkeăng tơring Dak Mil).

Pakĭng mê hlối xôh pơkeăng a tâi tâng hngêi dêi mâu ngế ki tâ tú, mâu tíu ki vâi prôk trohƀă mâu tíu ki nhôm tơ’lêi tâ tú, tíu tơdjâk troh. Mâu khu râ pơkuâ cheăng hiăng rĕng tăng 42 ngế F1 ki achê ƀă mâu ngế nêo tâ tú. Nôkố kơvâ ngăn pơkeăng thâ séa ngăn hâi ki vâi prôk, mâu tíu ki mâu ngế ki mê hiăng prôk troh, ối tung pơlât 14 hâi hdrối ƀă pơtối séa ngăn, tăng mâu ngế ki achê. Troh nôkố Dak Nông hiăng ai 46 ngế tâ tú pơreăng.

Gương tơplôu [ă tơbleăng