VOV4.Sêdang - Hâi lơ 9/8, kong pơlê Dak Nông ai tơ’nôm 7 ngế yương tĭnh ƀă virus SARS-CoV-2. Tung mê ai péa ngế muăn kơnốu 1 hơnăm pơrá F1. Tá péa ngế muăn kơnốu N.T.T (kot mâ hơnăm 2020) prếi muăn H.K.D (kot mâ hơnăm 2020) rơtế ối a tơring Dak Glong, Dak Nông pơrá cho F1 dêi ngế ki tâ pơreăng má 16.5470 nâ H.C.N (kot mâ hơnăm 1962). Nâ H.C.N cho ngế ki pơchoh hmân ếo prôk sap ing Pơlê kong kân Hồ Chí Minh vêh a Dak Nông.

Hâi lơ 3/8, tá péa ngế muăn kơnốu kố châ djâ lăm klâ ối krê tơkŭm, kơvâ ngăn pơkeăng pâk xo mơheăm tiah hmâ tiô pơkâ. Troh hâi lơ 9/8, 2 ngế muăn kố klêi kơ’nâi séa ngăn ƀă kih thuâ̆t RT-PCR yương tĭnh ƀă SARS-CoV-2. Riân troh kơxê hâi lơ 9/8, kong pơlê Dak Nông ai 155 ngế tâ COVID-19. Tung mê ai 12 ngế hiăng châ pơlât prêi, ƀă hiăng châ lo ing pơkeăng.