VOV4.Sêdang - Vâ hbrâ mơdât ki tâ tú dêi virus SARS-CoV-2 mot tung pơlê pơla, kong pơlê Dak Nông hiăng pơkâ thế mâu khu lêng ki ai tơdjâk rĕng pêi pro troăng hơlâ séa ngăn, klâ krê, rah ngăn mâu ngế ki vêh sap ing kơpong ki ai pơreăng vâ hbrâ mơdât pơreăng COVID-19. A tíu gâk Cái Chanh cho bo cheăng ki apoăng mot tung mâu kong pơlê Tây Nguyên: Khu lêng ki ai tơdjâk Dak Nông hiăng rĕng xing xoăng troăng prôk ăm tơtro, kơdroh tơdroăng ki mâu rơxế tot, pơtê vâ hbrâ mơdât pơreăng tâ tú.

Tơdrêng amê hnối séa ngăn inâi mâu ngế ki vêh rêh ối a kong pơlê Dak Nông ƀă tơbleăng ăm khu pơkuâ vâ rak ngăn, klâ ăm ối krê tro tiô pơkâ. Tiô riân ngăn dêi kơvâ cheăng ai tơdjâk troh kong pơlê Dak Nông sap ing mâu kong pơlê peăng Hdroh pêi pro mâu tơdroăng ki klâ ối krê pơlê pơla rêm hâi ai lối 5 rơpâu ngế to rơxế hon đa troh a mâu kong pơlê Tây Nguyên. A Dak Nông mâu hâi achê kố, ai kuăn pơlê vêh sap ing kong pơlê peăng Hdroh tâk hên vâ chê 1 rơpâu ngế môi hâi.

Katarina Nga tơplôu ƀă tơbleăng