VOV4.Sêdang - Rơnó xeăng tô cho rơnó ki xiâm dêi kuăn pơlê ki pêi chiâk pêi deăng kong pơlê Daklak. Rơnó kố, kong pơlê ai túa pơkâ mơdâ pêt 198 rơpâu ha mâu hdrê tu\m túa ki iâ hâi môi tiah báu, alâi, pôm ló, pôm loăng [ă mâu hdrê pêt ki ê. Mâu hơnăm hdrối nah sap ing khế 5 kuăn pơlê hiăng mơdâ pêt mâu hdrê tơmeăm la hơnăm kố xua kong prâi ôh tá tơniăn, mê vâ mơdâ pêt tơmeăm, Vi [an hnê ngăn kong pơlê Daklak hiăng hnê mơhno mâu tơring, cheăm athế pơtê môi khế ‘nôi vâ hbrâ ví [ă tơdroăng ki kong prâi pro ôh tá tơniăn klêi kơ’nâi ai kong mêi kân. Pôa Trần Quang Tây, kăn pơkuâ pêt tơmeăm, ối tung khu xiâm pêt tơmeăm [ă rak vế pơkeăng xôh kơdê oâ hdrong kong pơlê Daklak ăm ‘nâi: Tiô tơdroăng ăm ‘nâi ing tíu xiâm pơtâng tối ‘na hyôh kong prâi, khế 6 pơxiâm ai mêi, tung mâu roh kong mêi pơla hdrối kố nah bu cho kong mêi ki apoăng rơnó tá hâi mêi khât. Xua mê, kơvâ pêi chiâk pêi deăng xuân hiăng hnê mơhno hâi khế mơdâ pêt cho pơxiâm khế 6 tơku\m mơdâ pêt. Khu pơkuâ xuân hiăng hnê mơhno ăm mâu tơring, cheăm, mâu [ơrô ngăn ‘na pêi chiâk pêi deăng ai mâu troăng hơlâ ki xiâm séa ngăn ‘na tơdroăng ki kong prâi dêi rêm tơring, cheăm ki mơdâ pêt vâ ví tơdroăng ki kong tô khăng khoăng.

Katarina Nga tơplôu [ă tơbleăng