VOV4.Sêdang - Drêng tá hâi ‘nâi nhên la ngiâ tơdroăng ki xâu xía ing pơreăng COVID-19 kô pơtối xông tâ tú rế ó, xua ai kơdrâm mơngế ing peăng Hdroh pơtối prếo vêh dêi ngi pơlê cheăm, mê Khu hnê mơhno hbrâ, tơplâ, mơdât pơreăng COVID-19 kong pơlê Gai Lai dế pêi pro kơtăng khât mâu túa ki vâ hbrâ mơdât a pơlê cheăm, khŏm kâi châ mơdât tơdroăng tâ tú sap ing iâ tá troh a kơlo ki râ vâ khoh teăm châ tơpâ mơdât tơdroăng ki tâ tú dêi pơreăng.

Mâu hâi hdrối mê hía nah, tíu gak mơdât pơreăng COVID 19 a troăng kân lăm ngi kong pơlê ki ê kơxô̆ 14, kơpong tơkâ Kông 110, ối tung cheăm Ia Le, tơring Čư Pưh, kong pơlê Gia Lai ai tơdah hên ngế prôk lăm ƀă rơxế kơtâu, ki hên ing mâu kong pơlê peăng Hdroh vêh dêi a hngêi, pơlê. Rêm hâi, tíu gak kố séa ngăn, êng mơnhên, khăm ngăn châ lối 1.000 ngế. Vâ tơniăn ăm rơxế kơtâu, kuăn pơlê prôk lăm drô troăng kân mê xuân athế êng mơnhên kơtăng, vâ khoh kâi châ mơdât pơreăng tâ tú, kong pơlê Gia Lai hiăng pơtroh ƀok thái pơkeăng ƀă kan sat gak ngăn troăng klông, hnê prôk troăng, hnê mơhno kuăn pơlê ối pơtăng, khăm ngăn ki tô tung châ ƀă tối tơbleăng ăm ƀok thái pơkeăng rĕng má môi.

Khu ƀok thái pơkeăng a tíu gak mơdât pơreăng a kông 110 (cheăm Ia Le, tơring Čư̆ Pưh) hnê mơhno kuăn pơlê tối tơbleăng ăm ƀok thái pơkeăng

Kơnôm pêi tro tơdroăng hnê mơhno prôk troăng, klâ kơtăn mơngế hơngế ing troăng mot lo, tíu gak, khăm ngăn kuăn pơlê a kông 110 Gia Lai hiăng châ hlo mâu ngế tro tâ COVID 19. Trung tă Nguyễn Minh Tuấn, Kăn pơkuâ Khu kan sát rak tơniăn troăng prôk kơxô̆ 1, Kŏng an kong pơlê Gia Lai pêi hnoăng cheăng akố tối ăm ‘nâi:

“Ngin mơhnhôk tâi tâng mâu khu cheăng veăng séa ngăn, khăm ngăn rak tơniăn ăm tơdroăng hbrâ mơdât COVID 19 vâ ví tơdroăng chôm drô troăng kân; khu ƀok thái pơkeăng tơ’nôm mơngế pêi cheăng vâ xo rơkong tối tơbleăng dêi kuăn pơlê rĕng má môi, rak tơniăn troăng prôk ƀă djâ mơngế klâ kơtăn hơngế dêi pó’’.

Klêi kơ’nâi hnê prôk troăng, mâu kuăn pơlê ki nhôm tro tâ pơreăng kô châ djâ troh a tíu klâ kơtăn tơkŭm tiô pơkâ

Pôa Siu Y Ƀĕ, Phŏ hnê ngăn Vi ƀan tơring Čư̆ Pưh, kong pơlê Gia Lai tối ăm ‘nâi, tơring tơkŭm po tơrŭm tro khâp pơla mâu khu cheăng vâ ví pro pá ăm kuăn pơlê tơkâ hluâ tíu gak ngăn:

“Kơxô̆ mơngế vêh cho kơdrâm ‘nâng, tâng pêi cheăng ôh tá teăm tơdrêng mê kô tơ’lêi tâ tú pơreăng hên. Laga ngin xuân mơhnhôk kuăn pơlê, pin pôi tá tô tuăn lôí râ, đi đo pơtâng vâ tối tơbleăng tro tiô pơkâ, ôh tá ví prôk troăng kŭn, ví tíu gak vâ kơ ga tơniăn tối tơbleăng ăm ƀok thái pơkeăng tơdrăng ƀă klâ kơtăn mơngế tro tiô pơkâ’’.

Sap hâi lơ 26/4 troh măng tĭng ki kố, kong pơlê Gia Lai châ hlo tâi tâng vâ chê 30 ngế tro tâ COVID 19. Khu ƀok thái pơkeăng pêi pro hnoăng cheăng thâ kâng kơxái mơdât ôh tá ăm mot tung kơpong ai mơngế tâ pơreăng, ti tăng rĕng châ hlo, khăm ngăn tơdrêng mâu ngế ki tơdjâk troh mơngế nếo tro tâ. Tơdrêng mê, tơring xuân hiăng ăm 21 tíu klâ kơtăn, ƀă kâi vâ tơdah lối 3.000 ngế. 48 tíu klâ kơtăn ki ê xuân hiăng châ séa ngăn, hbrâ mâu tơmeăm khoăng vâ tơdah tơ’nôm dâng 7.000 ngế.

Jâ Nguyễn Thị Thanh Lịch – Kăn phŏ hnê ngăn Vi ƀan kong pơlê, Phŏ pơkuâ hnê mơhno hbrâ mơdât COVID 19 Gia Lai tối ăm ‘nâi, hbrâ mơdât tŭm ƀă mâu kơlo rơdêi dêi pơreăng ki xông tâ tú, kong pơlê hiăng hbrâ rơnáu vâ xing xoăng tơmeăm khoăng, ƀă kum châ tê tơmeăm pêi lo ing chiâk deăng tơ’lêi. ‘Na hbrâ tơmeăm pơlât, Gia Lai hiăng pơkâ  xúa, pơ’lêh Hngêi pơkeăng 331 (troăng Phạm Văn Đồng, Plei Ku) dâng 100 xoăng koi, kô pơlât ăm mâu ngế châi tamo ki râ. Mâu hngêi pơkeăng Pơlât kơ-o lo mơheăm, hngêi pơkeăng pơlât châi êi Xôu, Hngêi pơkeăng ƀă pơkeăng rêi nhâ hlá loăng ƀă pơlât ăm mâu ngế chó chêng tơvê kŏng (pơlê kong kơdrâm Plei Ku), xuân hiăng hbrâ rơnáu tơmeăm khoăng vâ pơlât ƀă mâu ngế nhôm tro tâ pơreăng ƀă tro COVID 19 ôh tá bê râ to lâi:

“Ngin pro hngêi pơkeăng pơlât COVID 19, tơxâng hnoăng cheăng ăm mâu ngế tro tâ pơreăng thế xúa kơmăi kơmok pơlât, tâ kơkốu ki pro ƀă kơmăi, lơ mâu tơdroăng châi ki ê; mơjiâng môi khu pơlât apoăng ăm mâu ngế ki ai tro tâ pơreăng châi râ, vâ pơlât krê. Pakĭng mê ngin mơjiâng môi toăng hngêi pơkeăng pơlât mâu ngế ki tro tâ pơreăng ôh tá bê râ’’.

Nguyễn Thảo chêh

A Sa Ly tơplôu ƀă tơbleăng