VOV4.Sêdang - A kong pơlê Gia Lai, hên khu tơrŭm, mâu ngế krê hiăng ai mâu tơdroăng cheăng pêi pro pơxúa vâ veăng kum tung mâu tơdroăng xơpá, tơbrê tơbrêh ƀă khu ki hbrâ mơdât pơreăng.

Vâ tơdjuôm ivá tŏng kum kong pơlê Gia Lai tung tơdroăng hbrâ mơdât pơreăng COVID 19, Khu tŏng kum mơngế pá puât (Flai Thu Skai) Fly To Sky tơrŭm ƀă Khu pơkuâ Droh rơtăm Việt Nam kong pơlê Gia Lai tơkŭm po Tơdroăng ‘’Xing xoăng tơdroăng tuăn pâ – Gia Lai tơdjuôm troh tah COVID 19’’ ƀă mâu tơdroăng pêi pro ki lĕm ‘na hnoăng dêi kuăn pơlê ƀă mơnhông hiâm mơno rŭm môi tuăn tung pơlê pơla. Khu tŏng kum mơngế pá puât ối diâp ăm Khu hnê mơhno hbrâ mơdât COVID 19 kong pơlê Gia Lai mâu tơmeăm khoăng môi tiah kên pâng rơkong môh, kế truâ ngiâ nhĕng mơdât ki hơtĕng têa hế, têa pơkeăng xếo kŏng kơdê pơreăng, kế khăm ki tô tung châ ƀă mâu tơmeăm kal xúa rêm hâi ki ê.

Ngoh Lê Văn Phúc – Kăn pơkuâ Khu tŏng kum mơngế pá puât tối:

“Cho môi ngế kuăn pơlê Việt Nam, cho môi ngế kuăn dêi kơpong tơnêi Gia Lai, á xuân môi tiah mâu pú hmâ tung Khu tŏng kum mơngế pá puât cho tô tuăn. Tung 4 roh pơreăng COVID 19 xông tâ tú, khu pơrá pêi pro mâu tơdroăng hbrâ mơdât pơreăng ƀă troh nôkố tâi tâng kơxô̆ liăn tŏng kum châ 5 rơtal liăn. Ƀă pói vâ cho tŏng kum ăm khu pêi hnoăng cheăng, xuân môi tiah kuăn pơlê pá puât tung kong pơlê, kum dêi pó drêng pá puât vâ tơdjuôm ivá troh tah COVID 19’’.

Mâu ngế ai hiâm mơno tŏng kum tơmeăm khoăng ăm mâu ngế hbrâ mơdât pơreăng a kong pơlê Gia Lai

Ƀă ngoh Phạm Thăng Bằng – Ngế pơkuâ kơdrum reăng rĭng a pơlê kong kơdrâm Plei Ku hiăng rơtế mâu khu pú tung kâu lăk ƀô̆ ‘’reăng rĭng Gia Lai’’ diâp 295 rơtuh liăn ƀă 100 kơthung xup kơxŏng khăng troh Khu hnê mơhno hbrâ mơdât COVID 19 kong pơlê Gia Lai.

Ngoh Phạm Thăng Bằng, tối:

‘’Á pói vâ mâu kơ koan cheăng ƀă kuăn pơlê rơtế môi tuăn, tơrŭm môi hiâm mơno, pêi pro hnê mơhno dêi khu râ kăn kơpêng vâ pin mơdât pơreăng, pêi kêi đeăng tơdroăng pói vâ dêi tâi tâng kuăn pơlê dế pói vâ cho mơdât tâi tâng pơreăng rế rĕng rế tro’’.

Mâu tơmeăm ki kal xúa rêm hâi ing mâu ngế ai hiâm mơno tŏng kum châ pơtroh mâu kơpong klâ kơtăn

Rơtế ƀă tơdroăng ‘’tŏng kum dêi pó’’ mâu hâi hiăng hluâ, kơdrâm mâu khu tŏng kum mơngế pá puât hiăng veăng tơlo hên tơmeăm khoăng, môi tiah: kên pâng rơkong môh, têa pơkeăng kơdê pơreăng, ƀă troh dâng tâ̆n kơchâi drêh, plâi, pôm tŭm túa vâ tŏng kum ăm khu mơdât pơreăng dế plâ hâi plâ măng tơplâ, mơdât pơreăng. Tiô Vi ƀan Măt trâ̆n Tơnêi têa Việt Nam kong pơlê Gia Lai, klêi kơ’nâi 3 khế mơhnhôk pêi pro, khu tŏng kum mơngế pá puât hiăng tơdah kơxô̆ liăn ƀă tơmeăm khoăng ing 345 khu pú hên, ngế krê veăng tơlo ăm tơdroăng hbrâ mơdât pơreăng kong pơlê Gia Lai, ƀă tâi tâng kơxô̆ liăn vâ chê 22 rơtal liăn.

Jâ Phạm Thị Lan – Kăn phŏ hnê ngăn Vi ƀan Măt trâ̆n Tơnêi têa Việt Nam kong pơlê Gia Lai tối ăm ‘nâi:

“Ngin hiăng krếo thế tơrŭm môi tuăn, tơdjuôm ivá ing mâu khu pú hên, rêm ngế krê, mâu kơ koan, tíu cheăng, khu tê mơdró môi tuăn tung tơdroăng hbrâ mơdât pơreăng COVID 19. Pin kô xúa kơxô̆ liăn tŏng kum kố vâ tŏng kum teăm tơdrêng mâu tíu xiâm klâ kơtăn dêi khu mô đô̆i kong pơlê ƀă mâu hngêi pơkeăng, tơdrêng amê xuân tŏng kum vâi krâ kuăn pơlê tung kơpong ai pơreăng tah lôi mâu tơdroăng pá puât, châ tơniăn tơdroăng rêh ối. Pói tơngah, ƀă tơdroăng môi tuăn, môi hiâm mơno mê pin kô mơ-eăm rơtế dêi pó vâ troh tah pơreăng’’.

Hoàng Qui chêh

A Sa Ly tơplôu ƀă tơbleăng