VOV4.Xơ Đăng - Hơnăm 2021, Gia Lai pêi châ tơdroăng ki mơdêk cheăng kâ 9,7%, hên má môi kơpong Tây Nguyên, nâp liăn tâk hên, châ vâ chê 7.600 rơtal liăn. Hơnăm 2022, kong pơlê mơ-eăm rak ivá mơdêk tâk troh 8,6%, rak tơniăn mâu tơdroăng pơkâ pơlê pơla ƀă hnoăng cheăng hbrâ mơdât pơreăng COVID-19. Mơ-eăm châ tơdroăng ki rơdêi ‘na cheăng kâ 8,65%, rêm ngế pêi lo liăn lối 60,44 rơtuh, nâp liăn châ tơkâ luâ 5.800 rơtal liăn, mê cho môi tung mâu kơlo rơhêng vâ ki kong pơlê Gia Lai tơmiât pêi pro tung hơnăm 2022.

Tiah mê, kong pơlê pơtối mơdêk pêi chiâk deăng xúa kơmăi kơmok chal nếo, tơrŭm tiô mâu tơdroăng ki kơnía, mơnhông ivá ‘mâi pêi; ivá tơxup tơbriât PCI, hơ’lêh chêh pro hlá mơ-éa. Mơdêk rơdêi tơdroăng ki mơjiâng tơrŭm hngêi trăng troăng klông, mâu tơdroăng tơkêa ki kal; mơnhông kơphô̆ tiô pơkâ ƀă túa pơkâ, tơmiât pêi troh túa pơkâ kơphô̆ ngiât, rơkê ƀă krá ton.

Kong pơlê Gia Lai xuân mơnhên, hbrâ mơdât pơreăng COVID-19 cho hnoăng cheăng ki kal, kal pêi pro tơdrêng ƀă pêi đi đo, pơtối, tơrŭm krá tơniăn ƀă tơrêm mâu tơdroăng cheăng mơnhông mơdêk cheăng kâ rêh ối pơlê pơla dêi hơnăm 2022 ƀă mâu hơnăm ki pơtối.

Katarina Nga tơplôu ƀă tơbleăng