VOV4.Sêdang -Maluâ tro tơdjâk xua pơreăng COVID-19, la tung 6 khế apoăng hơnăm 2021, ki rơdêi ‘na mơdêk cheăng kâ a Gia Lai xuân ối châ 9,7%, tâk péa hdroh tâng vâ pơchông ƀă khế hơnăm nah. Tơdroăng kố châ tơbleăng a rôh pơxiâm po hneăng hôp má 2, hneăng hơnăm 2021 – 2026 dêi Hô̆i đong hnê ngăn kong pơlê Gia Lai, po a kơxo lơ 9/8 a pơlê kong kơdrâm Plei Ku. Tiô tối tơbleăng a hneăng hôp, ƀă tâi tâng kế tơmeăm dêi kong pơlê châ 9,7%, ki rơdêi ‘na mơdêk cheăng kâ tung 6 khế apoăng hơnăm 2021 dêi Gia Lai tâk 2,33 hdroh tâng vâ pơchông ƀă khế kố hơnăm 2020.

Xuân tung 6 khế, kong pơlê pêi pro tơdâng tơ’mô troăng hơlâ hbrâ mơdât pơreăng COVID-19 tâ tú tung pơlê pơla, pâk vaccine hbrâ mơdât COVID-19 ăm lối 47.800 ngế, cho mâu ngế ki châ kơjo kum. Hneăng hôp má 2, hneăng hơnăm 2021 – 2026, Hô̆i đong hnê ngăn kong pơlê Gia Lai tiô tối hdrối po tung 2 hâi lơ 9 ƀă lơ 10/8 kô séa ngăn, tơpui mơnhên, tơbleăng 12  hlá mơ-éa pơtroh ƀă kơxop hlá mơ-éa pơkâ. Tung mê, hlá mơ-éa pơtroh ‘na ‘mâi rơnêu tơdroăng pơkâ kơxô̆ 100 dêi Hô̆i đong hnê ngăn ‘na séa ngăn, ‘mâi rơnêu pơkâ 3 túa kong hneăng hơnăm 2025 – 2030, dế tơ’mot tơdroăng tơmâng ngăn dêi kuăn pơlê.

Katarina Nga tơplôu ƀă tơbleăng