VOV4.Sêdang - Kơxo lơ 31/8, khu ki pêi dêi hnoăng cheăng dêi kong pơlê Gia Lai hiăng ăm 22 ngế vâi kơdrâi ki dế mơ-êa ƀă 2 ngế vâi hdrêng dế ối pơtân a Bình Dương vêh dêi ngi pơlê. Tâi tâng mâu vâi kơdrâi, vâi hdrêng kố hiăng châ troh a kơpong ki klâ ối krê tơkŭm E991 dêi kong pơlê Gia Lai. Mâu ngế ki kố kô châ klâ ối krê ƀă séa ngăn têa môh hên hdroh. Ki hên mâu vâi kơdrâi ki châ ăm vêh rôh kố pơrá dế mơ-êa lối 6 khế, ai tơdroăng rêh ối xơpá, malối ai ngế ki dế mơ-êa khế má 9.

Gia Lai: Tơdah 24 ngế kơdrâi mơ-êa ƀă vâi hdrêng tơxĭn vêh sap ing Bình Dương

Vâ ăm kơxô̆ ngế kuăn pơlê kố vêh, Gia Lai hiăng xing xoăng 1 ngế ƀok thái pơkeăng ƀă 2 ngế ngăn rơneh kuăn lăm tiô khu kố vâ tŏng kum drêng ai tơdroăng. Hdrối mê, Khu ngăn cheăng pêi mố đô̆i rong ƀă pơlê pơla Gia Lai ƀă peăng Bình Dương hiăng tởŭm, tŏng kum séa ngăn têa môh; xing xoăng kuăn pơlê Gia Lai troh tíu ki tơkŭm to a rơxế vêh pơlê.

Apoăng ai 25 ngế kơdrâi ƀă 4 ngế vâi hdrêng châ djâ vêh, laga, xua ivá, bu ối 24 ngế ai tŭm tơdroăng ki vâ châ vêh. Tâi tâng 22 ngế kơdrâi dế mơ-êa ƀă 2 ngế hdrêng vêh a kong pơlê pơrá rak tơniăn ivá, rôh tơdah xo kố tơ’lêi, tơniăn.

Katarina Nga tơplôu ƀă tơbleăng