VOV4.Sêdang - Tơring Đăk Đoa, kong pơlê Gia Lai rơdâ lối  990 km2, ai 11 to thôn, pơlê, ối tung 17 to cheăm, pơlê kân, Tơnêi kân rơdâ, kuăn pơlê preăng prêh, la kơnôm xúa tro tơdroăng ing Zalo Facebook mê khu râ, kơvâ cheăng a tơring kố hiăng châ rĕng ‘nâi, rĕng plĕng ƀă ‘nâi hbrâ mơdât tơdroăng tâ tú dêi pơreăng.

Râng a kŏng cho phôn râng kŏng chal ki nếo chiâng po ngăn ƀă hơ’ngrăng kŏng, ngoh Phạm Công Tùng, kuăn pơlê thôn Tân Lập, cheăm Trang, tơring Đăk Đoa, kong pơlê Gia Lai po khu Zalo dêi thôn vâ tăng ‘nâi tơdroăng COVID-19. Ngoh Tùng ăm ‘nâi, rêm hâi, khu hnê mơhno cheăng hbrâ mơdât pơreăng dêi cheăm pơtroh 2 tơdroăng tơbleăng cho po ngăn tơdroăng pơreăng a kong pơlê Gia Lai ƀă mâu tơdroăng kal a mâu kong pơlê, pơlê kong kân ki ai pơreăng.

Hên tơdroăng châ mơhno tối tiô túa đồ họa, mê rêm ngế tơ’lêi ‘nâi kuăn ‘nĕng dêi tơná lăm hriâm, lăm pêi cheăng vêh sap ing lâi mê pơklât thế klâ ối krê tơkŭm, lơ bu kal athế chêh tối dêi inâi châ chăn ƀă séa ngăn a hngêi. Xuân tơbleăng ing khu Zalo kố, kuăn pơlê tung thôn xuân tŏng kum khu hnê mơhno cheăng séa ngăn kuăn pơlê ai pêi pro kơtăng mâu tơdroăng pơkâ ‘na hbrâ mơdât pơreăng há lơ ôh:

“Tơdroăng séa ngăn kuăn pơlê sap ing kơpong ki ai pơreăng vêh lơ kuăn pơlê hiăng tâi hâi khế pơkâ thế klâ ối krê tơkŭm vêh a hngêi klâ ối krê a hngêi, kuăn muăn lăm hriâm, lăm pêi cheăng vêh mê ngin xuân séa ngăn. Kuăn muăn lăm hriâm vêh mê kuăn pơlê hiăng ‘nâi, tơbleăng tơdrêng ing tin nhăn, tơbleăng a trang tơbleăng tơdjuôm, tơbleăng ăm hngêi pơkeăng cheăm, Vi ƀan hnê ngăn cheăm vâ pơkâ thế vâi chêh tối dêi inâi vâ kuăn pơlê pôi xâu”.

Kŏng an tơring Đăk Đoa hnê kuăn pơlê po tăng mâu khu zalo vâ tăng tơdroăng kal ‘na pơreăng COVID-19

Pôa En, kăn hnê ngăn Vi ƀan, kăn hnê mơhno hbrâ mơdât pơreăng COVID-19 cheăm Trang, tơring Đăk Đoa ăm ‘nâi, nôkố, 5 thôn tung cheăm pơrá ai khu Zalo. Rêm khu ai sap ing 120 troh 150 ngế cho teăng mâ dêi mâu rơpŏng kuăn pơlê. Khu hnê mơhno hbrâ mơdât pơreăng dêi cheăm xing xoăng mâu ngế veăng tung mâu khu vâ tiâ mơnhên tơdrêng hlối mâu tơdroăng ki kuăn pơlê tô tuăn.

Ai drêng ‘nâ, mê cho mâu rơkong tiâ mơnhên ‘na hlá mơ-éa chêh tối ‘na ivá, ai drêng ‘nâ cho mâu tơdroăng cheăng athế pêi drêng klâ ối krê a hngêi, ai drêng ‘nâ cho rơkong kơ-êng ‘na mâu kuăn pơlê sap ing kong pơlê, pơlê kong kân ki ê vêh a cheăm hiăng chêh tối ivá há lơ ôh.

“Kơnôm ing mâu khu zalo kố mê tung pơla hdrối kố nah, cheăm hiăng tơdah xo 143 ngế kuăn pơlê vêh sap ing kong pơlê ki ê. Tung mê, ai mâu kuăn pơlê ki ‘nâi pêi pro klâ ối krê tơkŭm, ai mâu ki ‘nâ klâ ối krê a hngêi. Kuăn pơlê hiăng tơdjêpalo mê ngăn inâi mâu kong pơlê ki ai pơreăng, vâi ‘nâi, vâi hbrâ rơnáu xêh. Tâng Pơlê kong kân Hồ Chí Minh pêi pro pơkâ 16 vâi hbrâ rơnáu lăm troh chêh tơbleăng dêi tơdroăng a hngêi pơkeăng cheăm”.

Kơnôm ing xúa tơƀrê măng pơlê pơla zalo, facebook mê kŏng an tơring Đăk Đoa pêi klêi tơdroăng pơkâ ‘na hbru ăm theh căn cước kuăn pơlê, mê xuân ối rak tơniăn hbrâ mơdât pơreăng

Thiê̆u tă Khuất Đức Hiệu, kăn pơkuâ Kŏng an cheăm Trang ăm ‘nâi, xuân kơnôm tơƀrê tung tơdroăng ki tơrŭm tơdjêp dêi mâu khu Zalo, sap ing khế 3 troh khế 6/2021, tíu pêi cheăng kố hiăng pêi klêi tơdroăng pơkâ rơhêng hbru lối 3.600 to theh căn cước kuăn pơlê la xuân ối rak tơniăn hbrâ mơdât pơreăng. Kŏng an cheăm Trang tơbleăng tơdroăng ‘na pơreăng, tíu pro hlá mơ-éa hbru theh căn cước kuăn pơlê. Kuăn pơlê bu troh tíu ki hbru theh athế tơkôm, hlá mơ-éa xuân tơ’lêi ƀă rak tơniăn klâ kơtăn, ôh tá tơkŭm luâ 20 ngế a tíu pro theh căn cước kuăn pơlê.

“Klêi xo kơxô̆, á thế vâi veăng tung trang zalo dêi tơná hlối, thế vâi krâ nhŏng o vêh a hngêi, vêh troh a hngêi vâi thế dêi rơpó, vâi tơbleăng xêh ăm dêi rơpó. Dâng 30 phut á nhăn môi hdroh cho, ô vâi krâ nhŏng, nôkố troh a tíu kơxô̆ 59 mê mâu vâi krâ nhŏng o kơxô̆ 69 cho vâi hbrâ, vâi troh. Tơpui ‘na tơdroăng a trang zalo kố, tơ’lêi hlâu ăm kuăn pơlê ƀă ôh tá ối tơkŭm hên kơdrâm mơngế”.

Tiô riân ngăn dêi tơring Đăk Đoa, nôkố rơring ai lối 40 rơpâu to phôn râng kŏngai xúa 3G, 4G. Mơnhên kố cho môi to ƀâng tối tơbleăng tơƀrê, rĕng ƀă kơxô̆ nâp iâ, sap ing khế 3/2020, Vi ƀan hnê ngăn tơring Đăk Đoa hiăng pơcháu Kŏng an tơring ƀă mâu fanpage tung facebook ƀă ƀâng tơbleăng tơdroăng kal Zalo official Account ăm Vi ƀan hnê ngăn ƀă kŏng an dêi 17 to cheăm, pơlê kân tung lâp tơring.

Akố, kuăn pơlê chiâng vâ po tăng mâu tơdroăng cheăng kâ rêh ối pơlê pơla a cheăm tơring, séa ngăn tơdroăng ki pơkâ tơleăng mâu hlá mơ-éa ƀă tơbleăng tơdroăng pơereăng. A râ cheăm, tíu pêi cheăng xuân tŏng kum mâu thôn mơjiâng mâu khu zalo vâ tơdjêp tơpui ƀă kuăn pơlê ‘na tơdroăng ki hbrâ mơdât pơreăng COVID-19.

Malối cho mâu ƀâng tơbleăng tơdroăng kal sap ing râ tơring, troh cheăm, chu troh thôn pơlê pơrá châ tơdjêp ƀă dêi rơpó. Xua mê, bu kal mot tung khu kố, kuăn pơlê chiâng vâ tơpui phôn tơdrêng hlối ƀă khu hnê mơhno hbrâ mơdât pơreăng lơ kăn pơkuâ kŏng an râ cheăm, tơring tâng kal. Đăi ŭi Đàm Mai Minh Tuấn, phŏ Đô̆i trưởng, Đô̆i mơjiâng tơdroăng rak vế gak kring tơnêi têa, Kŏng an tơring Đăk Đoa ăm ‘nâi, tơdroăng cheăng tung khu online hiăng kum kơdroh kơxô̆ liăn nâp, tơdrêng amê hnối tơƀrê tung tơdroăng ki hnê tối ƀă mơdêk nhên khât:

“Klêi kơ’nâi tơbleăng khu zalo ƀă fanpage, chôu phut hbrâ mâu hồ sơ ki gá ‘nâng ‘nâi tâ. Kơxô̆ mâu droh rơtăm, phô̆m vâ xông kân xúa măng pơlê pơla hên tâ mâu ngế ki hiăng krâ, mê kơxô̆ ngế châ xúa, tơbleăng tro tâ, rak tơniăn tâ hên.

Drêng kăn ƀô̆ lăm troh a thôn, pơlê, kơchuâ chêh um méa, ƀai chêh, video, kơmăi kơmok tơvế djâ gá tơvâ. La a măng pơlê pơla, gá ‘niân tâ, bu kal pơ’lêh tơbleăng 3 troh 4 yâi mê rêm ngế hiăng ‘nâi”.

Tơdroăng ki xúa kơmăi tĭnh, phôn râng kŏng ki rơkê hiăng châ tơbleăng a kong pơlê Gia Lai, sap ing mâu pơlê, cheăm kơpong hngế hngo: tơdroăng kuăn pơlê xúa mâu măng pơlê pơla vâ tơpui tơno, tơdjêp ƀă dêi rơpó xuân hiăng hên. Xúa măng pơlê pơla tung rak ngăn pơkuâ, mâu kơ koan, ƀơrô-kơvâ cheăng, mâu thôn pơlê, cheăm a Đăk Đoa tối krê, Gia Lai tối tơdjuôm hiăng ‘mâi rơnêu ki xơpá xúa hngế hngo tơdroăng ki ôh tá hlê plĕng, kum ăm kuăn pơlê troh achê tâ ƀă khu kăn pơkuâ rêm râ.

Tung tơdroăng klâ ối krê pơlê pơla hbrâ mơdât pơreăng COVID-19, mâu tơdroăng ki xúa mê rế hía rế ăm hlo ki tơƀrê khât, veăng kum pro kơdroh pơreăng tâ tú, rak tơniăn cheăng kâ tê mơdró.

NguyễnThảo VOV Tây Nguyên

Katarina Nga tơplôu ƀă tơbleăng