VOV4.Sêdang -  Tơdroăng ‘na mơngế pêi cheăng cho môi tung mâu tơdroăng ki kal tơpui tung péa hâi pêi cheăng má mơ’nui klêi Kuô̆k hô̆i po iâ hâi hôp rôh má môi  bú 3 hâi. Tung kơxo lơ 26/7, Vi ƀan pơkuâ cheăng Kuô̆k hô̆i tơbleăng tơdroăng tơpui klêi a Khu kăn ƀă tối mơnhên, pơtối tơmâng xo rơkong veăng hnê khĕn dêi mâu kăn Kuô̆k hô̆i ‘na tơdroăng rah xo ngế pro Kăn xiâm hnê ngăn tơnêi têa. Ngế ki châ rah xo cho pôa Nguyễn Xuân Phúc, Kăn xiâm hnê ngăn tơnêi têa dế nôkố. Klêi tơpui tơno, Kuô̆k hô̆i rah xo Kăn xiâm hnê ngăn tơnêi têa ƀă tơdroăng tâ phĭu pơkí, tơbleăng, klêi mê ƀă Kăn xiâm hnê ngăn tơnêi têa ki nếo châ tơbleăng xo pêi hnoăng cheăng.

Mâu kăn Kuô̆k hô̆i tâ phĭu tâi tâng mâu ngế ki hôp a rôh hôp má môi

Pơtối tơdroăng ‘na rah xo kăn, Kăn xiâm hnê ngăn tơnêi têa thế Kuô̆k hô̆i   tâ phĭu rah xo ngế pro xiâm hnê ngăn Chin phuh, rah xo Kăn xiâm phŏ hnê ngăn tơnêi têa, kăn tơleăng xiâm, Ngế xiâm séa ngăn arak luât. Klêi tơpui tơno a khu ‘na mơngế ki vâ rah xo ăm inâi mâu ngế châ rah xo kô châ  Vi ƀan pơkuâ cheăng Kuô̆k hô̆i tơbleăng tung rôh hôp peăng kơxê kô hdrối Kuô̆k hô̆i vâ têk kŏng tơbleăng inâi tâ phĭu rah xo.

Gương tơplôu ƀă tơbleăng