VOV4.Sêdang - Kơxê lơ 1/8, pôa Nguyễn Văn Nên, Kăn xiâm pơkuâ hnê ngăn cheăng Đảng Pơlê kong kân Hồ Chí Minh ƀă pôa Nguyễn Thanh Long, Ngế xiâm pơkuâ ngăn pơkeăng ƀă khăm pơlât tơnêi têa hiăng séa ngăn tơdroăng mơjiâng pro Tíu xiâm pơlât mâu ngế tro tâ pơreăng COVID 19. Khu xiâm ngăn pơkeăng ƀă khăm pơlât pơkâ thế tơdah ngế tro tâ pơreăng COVID 19 a 4 tíu xiâm pơlât kố; pơcháu Hngêi pơkeăng Đăi hok Y dươ̆k Pơlê kong kân Hồ Chí Minh pôu râng hnoăng cheăng akố.

Kăn pơkuâ Pơlê kong kân Hồ Chí Minh ƀă Khu xiâm ngăn pơkeăng ƀă khăm pơlât séa ngăn mâu tíu mơjiâng Tíu xiâm pơlât mâu ngế tro tâ pơreăng

Kơpong pơlât ăm mâu ngế tro tâ COVID 19 kô châ xúa mâu tơmeăm khoăng ki ai hlâu dêi hngêi pơkeăng môi tiah kơmăi hiâm, xoăng koi pơlât. Ki ahdrối kô ai 70 xoăng koi pơlât, tiô tối hdrối mơdêk to 500 xoăng koi pơlât. Pơxiâm apoăng sap hâi lơ 2/8, hngêi pơkeăng kô pơxiâm tơdah mâu ngế tro tâ COVID 19. Khu râ kăn pêi cheăng xuân hiăng troh séa ngăn Khoa hồi sức tích cực 500 xoăng koi pơlât a Hngêi pơkeăng pơtân kơxô̆ 16 (Pơlê kân 7, Pơlê kong kân Hồ Chí Minh), tíu hngêi pơkeăng Bạch Mai dế pơcháu hnoăng pơkuâ.

Pôa Nguyễn Văn Nên, pơchân tối kal kơdroh tơdroăng pro mơ-éa, tơ’nôm rĕng má môi mâu tơmeăm ki lâi tá hâi tŭm tŭm vâ mâu tíu xiâm tơdah tơdrêng mâu ngế tro tâ pơreăng ki kôm mot pơlât.

A Sa Ly tơplôu ƀă tơbleăng