VOV4.Sêdang - Hơnăm hriâm nếo 2021 – 2022 hiăng vâ chê troh. Laga, tâng vâ pơchông ƀă kơlo pơkâ thái cô tung lâm, mê kơvâ ngăn hnê hriâm ƀă hnê mơjiâng tuăn ngoâ rơkê kong pơlê Gia Lai dế kal 3.721 ngế thái cô rêm râ hriâm. Ki nhên gá, tiô riân ngăn dêi Khu ngăn hnê hriâm ƀă hnê mơjiâng tuăn ngoâ rơkê kong pơlê Gia Lai, tâng vâ pơchông ƀă tơdroăng pơkâ, hơnăm hriâm 2021 -2022 kố, kong pơlê dế kal 1.67 ngế thái cô râ mầm non; 96 ngế thái cô râ má môi; 726 ngế thái cô râ má péa ƀă 372 ngế thái cô ƀô̆ môn a râ má pái.

Ôh tá tŭm thái cô a kong pơlê Gia Lai

Malối, sap ing hơnăm 2021 – 2022, pêi pro tơdroăng hnê hriâm phôh thong nếo, râ mầm non ƀă râ má môi athế hriâm 2 rôh tung môi hâi mê tơdroăng ki ‘mot tơ’nôm thái cô vâ rak tơniăn ki rơkê tung hnê cho tơdroăng ki kal. Hlo tơdroăng kố, Vi ƀan hnê ngăn kong pơlê Gia Lai hiăng ai hlá mơ-éa pơtroh ăm mâu khu xiâm kơvâ cheăng ki ai tơdjâk troh, pơkâ thế ăm phêp kong pơlê châ rah xo, kĭ tơkêa, vâ mơdêk kơxô̆ ngế thái cô hnê a lâm, rak tơniăn rơkê tung hnê ƀă hriâm; tơdrêng amê hnối pơtê pơtân tơdroăng ki kơdroh ƀiên chê̆ ăm kơvâ hnê hriâm.

Katarina Nga tơplôu ƀă tơbleăng