VOV4.Sêdang - Drêng ai pơreăng COVID-19 xông tâ tú rế ó a Pơlê kong kân Hồ Chí Minh ƀă mâu kong pơlê kơpong peăng Hdroh tơnêi têa, lối rơpâu ngế hiăng prếo vêh dêi a pơlê ƀă rơxế hon đa, prôk tiô troăng kân kơxô̆ 14. Ai mâu ngế prếo a Tây Nguyên la xuân ai mâu ‘nâ vêh a dêi Peăng Tơdế tơnêi têa hơngế hơngo. Tơkâ luâ to lâi hrĭng km kơto rơxế hon đa, thăm nếo kơtâu rơxế bê troh rơpâu km, chơ hơ’gok hơ’gâ kế tơmeăm, thăm nếo ai tá mâu vâu ‘nĕng, hmâ kơmăng ƀă khía mơhot, vâi bu tơmât to tơdroăng khŏm châ prếo vêh dêi a pơlê tơniăn. Tung pơla prôk drô troăng mê, mơngế ki prôk mê hiăng châ khu râ, pơkuâ cheăng tơveăng kum ‘na kế kâ, tơmeăm khoăng, khăm pơlât ivá châ chăn, tơdrêng amê, hnối khăm ngăn vâ ăm klâ ối krê ƀă mâu ngế ki ai tơdjâk troh pơreăng COVID-19.

Tíu ki gâk ngăn drô troăng, a kơpong Cai Chanh, ối tung tơring Dak Rlâp, kong pơlê Dak Nông cho hơlâ ki apoăng drô troăng kân 14 mot tung mâu kong pơlê a kơpong Tây Nguyên, xua mê, kố xuân cho tíu ki trâm tơdroăng pá má môi xua kuăn pơlê prôk troh akố rế hía rế kơdrâm. Vâ kơdroh tơdroăng ki hâ ho kơ mơngế, pơreăng xông tâ tú, mê khu kŏng an, khu ngăn ‘na troăng prôk-rơxế kơtâu hiăng klâ xing xoăng troăng prôk. Pôa Phan Nhật Thanh, Kăn hnê ngăn Vi ƀan tơring Dak Rlâp tối tiah kố:

‘’A tíu ki gak ngăn Cai Chanh dêi tơring Dak Rlâp, ngin thăm rế pêi pro tơdroăng hnê mơhno tối, séa ngăn ƀă tơno tối ‘na ivá châ chăn. Tung pơla hdrối mê hía nah, maluâ kơxô̆ kuăn pơlê prếo dêi ngi pơlê xiâm cho kơdrâm, la vâi krâ-nhŏng o xuân rak vế tro tiô tơdroăng hiăng hnê thế, ối kơtăn dêi pó hơngế tro tiô tơdroăng hiăng hnê. Mâu kŏng an ki gak ngăn drô troăng Cai Chanh xuân hơ’lêh dêi pó pêi cheăng môi hâi ai 3 hdroh. A mâu tíu ki hâ ho ngin xuân ăm tơ’nôm mâu lêng kuăn pơlê, kăn ƀô̆ ngăn ‘na pơkeăng ƀă kăn ƀô̆ pêi cheăng cheăm dêi mâu cheăm achê mê veăng kum’’.

Tíu ki gak ngăn a tíu gak 110 Gia Lai kum hmê kơchâi ăm kuăn pơlê

Tiô tơdroăng riân ngăn dêi kơvâ cheăng a kong pơlê Dak Nông tối, sap ing mâu kong pơlê peăng Hdroh mơdât kuăn pơlê prôk lăm tung pơlê pơla, tâng vâ riân ngăn rêm hâi ki vâ iâ ai lối 5 rơpâu ngế kơto rơxế hon đa prếo vêh a mâu kong pơlê kơpong Tây Nguyên. A Dak Nông mâu hâi achê pơla kố, kuăn pơlê ing mâu kong pơlê vêh ngi hngêi xuân tâk vâ chê 1 rơpâu ngế.

Kơxê măng lơ 29/7 pơla hdrối kố nah, ai dâng 900 ngế ki pêi cheăng a Đồng Nai prếo a Dak Lak ƀă rơxế hon đa. Kơxô̆ mâu ngế ki kố hiăng chêh inâi ƀă mâu kơ koan dêi kong pơlê Đồng Nai ƀă bu châ prếo vêh klêi kơ’nâi test âm tĭng ƀă pơreăng COVID-19 vâ tơniăn ôh tá tro mơdât a mâu tíu ki gak ngăn drô troăng. Mâu khu râ kŏng an, lêng kuăn pơlê dêi kong pơlê Đồng Nai hiăng ăm khu ki veăng chiân kuăn pơlê prếo vêh drô troăng vâ chê 400km, klêi mê, hnối ăm rơxế ki pơto kế kâ, tơmeăm xúa vâ ăm mâu ngế ki prếo vêh mê châ ôu kâ drô troăng.

Tơdroăng prôk mê, kơtâu rơxế plâ kơmăng, kong xêi há thâp, drêng troh a Dak Lak, khu râ kŏng an, ƀă hên kơvâ cheăng ki ê hiăng tơdah mâu kuăn pơlê ki kố, ƀă ăm vâi ối tơkŭm a Hngêi trung phôh thong kuăn ngo Nơ Tang Lơng, pơlê kong kơdrâm Ƀuôn Ma Thuột vâ pêi pro mâu tơdroăng ki kal, ai tơdjâk troh.

Hnê tối kuăn pơlê mot tung Tíu gak ngăn hbrâ mơdât pơreăng COVID-19 Sao Mai

Măng tĭng hdrối, a drô troăng kân kơxô̆ 14, pơtối ai hên khu ngế lo ing Pơlê kong kân Hồ Chí Minh ƀă mâu kong pơlê peăng Hdroh prếo dêi ngi pơlê. Ai mâu ‘nâ vêh troh a Tây Nguyên, ƀă xuân ai mâu ‘nâ prếo vêh troh a Peăng Tơdế tơnêi têa. Klêi kơ’nâi tơkâ luâ kong pơlê Dak Nông, Dak Lak, vâi ối trâm tíu gak ngăn COVID-19 a kông 110, tơring Čư̆ Pưh, kong pơlê Gia Lai. Akố, pôa Hồ Văn Thanh dế rơtế ƀă dêi mâu pú hmâ kơtâu rơxế ing Pơlê kong kân Hồ Chí Minh vêh a Kon Tum tối ăm ‘nâi:

‘’Á ing kong pơlê ki ê, á hlo mâu kăn ƀô̆ akố pêi cheăng kơhnâ khât, ăm ngin têa kơxăng, têa tôu, xup kơxŏng khăng, kơ-ƀăn mi. A mơnê tơdroăng ki tŏng kum dêi kong pơlê Gia Lai’’.

Khu kŏng an kong pơlê Kon Tum tơdah kuăn pơlê ing hơngế mot tung kong pơlê

Tiô Trung tă Nguyễn Minh Tuấn, Đô̆i trương Kan sat gak ngăn troăng prôk kơxô̆ 1, Kŏng an kong pơlê Gia Lai tối, tung mâu hâi pơla hdrối kố nah, ai kơdrâm mơngế ƀă rơxế hon đa lo ing kơpong ki ai tâ pơreăng. Klêi kơ’nâi chêh tối, khăm ngăn ‘na ivá châ chăn, vâi ki mê châ kum ăm pơtê pơtân, ai phái, kơchâi kâ, têa ôu. Klêi mê, khu râ pơkuâ cheăng ối hnê tối ‘na tơdroăng ki châ tơ’lêi vâ prếo vêh dêi a pơlê.

‘’Dế nôkố, xuân môi tiah a mâu hâi ki ai kơdrâm mơngế prôk lăm, vâi krâ-nhŏng o a mâu kơpong ki ai pơreăng, mê ngin hiăng ăm klâ ối krê ai sap ing 500 troh 600 ngé. Ƀă vâi krâ-nhŏng o a mâu kong pơlê ki ê drêng tơkâ luâ kong pơlê Gia Lai xuân ai dâng vâ chê 600 ngế’’.

Drô troăng vâ prếo vêh dêi ngi pơlê a troăng kân kơxô̆ 14, tơkâ luâ tâi tâng kong pơlê Gia Lai, mâu ngế ki prếo mê pơtối trâm a tíu gak ngăn Sao Mai, cho hơ’lâ peăng hdroh mot tung kong pơlê Kon Tum. Maluâ ôh tá pro kơtăng môi tiah Cai Chanh dêi kong pơlê Dak Nông, la tâng vâ riân rêm hâi xuân ai 250 troh 350 ngế tơkâ luâ tíu i gak ngăn kố. Akố, mâu khu kŏng an, khu ngăn ‘na troăng prôk – rơxế kơtâu, khu ƀok thái pơkeăng ƀă hên khu râ kơvâ cheăng ki ê hiăng plâ hâi plâ măng vâ tơdah mâ ngế prếo ing kơpong ai pơreăng. Klêi kơ’nâi châ hnê tối pơtê pơtân vâ ai ivá, kuăn pơlê châ kum têa ôu, hmê kơchâi, tơxông, kơ-ƀăn mi ƀă châ kum ăm liăn rôe têa koxăng pêng kơ-ƀin rơxế hdrối vâ pơtối prôk drô troăng vêh dêi a pơlê xiâm.

Ngoh Lê Hương, hngêi ối a tơring Phú Vang, kong pơlê Thừa Thiên Huế, tối ăm ‘nâi:

‘’A lo ing Phú Giáo, kong pơlê Bình Dưong vêh a kố. Drêng troh a Bình Phước, klêi mê pơtê iâ, kơâu nếo troh a Dak Nông. Klê mê, pơtối prôk troh a Gia Lai. A kong pơlê Gia Lai ai trêng ăm ngin têa kơxăng, kế kâ, têa ôu. Kan sat gak ngăn troăng prôk a Kon Tum ai kum ăm ngin têa kơxăng, kế kâ ƀă têa ôu’’.

Drêng trâm pá puât, xahpá ó khât dêi mâu ngế ki pêi cheăng, mâu ngế lăm  pro kŏng nhân, mâu ngế ki cheăng pá kong drô troăng vêh lo ing kơpong tâ pơreăng COVÌD-19 peăng Hdroh vâ prếo dêi ngi pơlê xiâm, rơtế ƀă khu kăn pơkuâ mâu kong pơlê tung kơpong Tây Nguyên, hên khu râ, kơvâ cheăng, mơngế krê dêi mâu kong pơlê xuân hiăng veăng tơlo rêm hâi lối hrĭng kơhôp hmê, rơhé, kế kâ kum ăm mâu ngế ki pêi cheăng hơngế mê châ prếo vêh dêi pơlê xiâm tơ’lêi ƀă tơniăn tâ.

                                                                                    VOV Tây Nguyên

Nhat Lisa tơplôu ƀă tơbleăng