VOV4.Sêdang -Pơtối tơdroăng Hôp Hô̆i đong AIPA roh má 42, hâi lơ 24/8, po hneăng hôp Vi ƀan kal kí, Vi ƀan cheăng kâ ƀă Vi ƀan ngăn ‘na rêh ối pơlê pơla. Hneăng hôp Vi ƀan Kal kí tơpui tơno 3 tơdroăng: mơdêk kring tơniăn tung măng Internet ƀă kring vế mâu tơdroăng chêh ‘măn tung kơmăi ki vâ pêi mâu tơdroăng tung măng ki rơdêi dế ASEAN; ‘na mơdêk kring tơniăn kuăn mơngế tung kơvâ kih thuât kơxô̆ tá mâu tơdroăng ăm ASEAN ƀă mơdêk tơpui tơno dêi mâu kăn Kuô̆k hô̆i tơpui troh tơdroăng pêi pro dêi mâu kong têa tung ASEAN.

Khu kăn Kuô̆k hô̆i Indonesia tơ’nôm tơdroăng thế pêi tơdrêng ‘na mơ-eăm tŏng kum dêi Kuô̆k hô̆i ‘na tơdroăng kong têa Myanmar. Hneăng hôp Vi ƀan ngăn cheăng kâ: tơpui tơno 2 tơdroăng. Mê cho: mơdêk tơrŭm cheăng kâ tung ASEAN ing mơnhông mơdêk kơxô̆ pơ’lêh mâu khu mơdró rơkê ki kŭn, ki krâ kơvâ ƀă mơnhông cheăng kâ drêng hiăng tâi pơreăng COVID-19: Tơrŭm ôm hyô tung ASEAN.

A hneăng hôp mê, khu kăn Việt Nam tối kô tơbleăng ‘mâi mơnhông ƀă mơdêk ‘na ôm hyô tiô mâu tơdroăng pơkâ mơnhông krá tơniăn ton ƀă tơniăn tung tŭm tơdroăng. Tí tăng ‘nâi plĕng ƀă hlối mơnhông ‘na mâu tơmeăm ôm hyô ki nếo ai tiô púi vâ ki nếo klêi kơ’nâi hiăng tâi pơreăng COVID-19.

Hneăng hôp dêi Vi ƀan rêh ối pơlê pơla tơkŭm tơpui tơno 3 tơdroăng. mê cho mơdêk tơrŭm cheăng ƀă mơdêk kih thuâ̆t kơxô̆ tâi tâng mâu tơdroăng cheăng vâ kơdroh ki tơdjâk pơ’lêh hyôh kong prâi; Tơbleăng pêi mâu pơkâ mơnhông krá tơniăn tung lâp plâi tơnêi vâ pêi châ tơ-ƀrê a râ tơnêi têa; Hnoăng cheăng pêi cheăng bă kơmăi kơmok pro tơ’lêi hlâu ăm kuăn pơlê ki veăng tâ phĭu.

Gương tơplôu ƀă tơbleăng