VOV4.Sêdang - Hâi lơ 19/8, Hô̆i đong hnê ngăn kong pơlê Dak Nông hneăng má 4, hneăng hơnăm 2021 -2026 pơxiâm po hneăng hôp má 2. Tiô tơdroăng tơbleăng a hneăng hôp, 6 khế apoăng hơnăm 2021, lâp kong pơlê ai 7 khu pơkâ mơnhông mơdêk cheăng kâ rêh ối pơlê pơla chía tơtêk. Ki têi ‘na mơdêk tơdjuôm dêi kong pơlê tiô riân châ 6,06%. Tâi tâng kơxô̆ liăn nâp ăm tơnêi têa châ 1.582 rơtal liăn tâk 29% tâng vâ pơchông ƀă khế kố hơnăm 2020 ƀă châ 58% tiô tơdroăng pơkâ dêi kong pơlê pơcháu. Laga, xua pơreăng COVID-19 pơtối tâ tú, pro ôh tá tơniăn hiăng tơdjâk kân troh mơnhông mơdêk cheăng kâ rêh ối pơlê pơla dêi kong pơlê.

Tâi tâng a hneăng hôp Dak Nông

A hneăng hôp kố, mâu kăn kô séa ngăn, pơkâ hên tơdroăng ki kal. Kăn hnê ngăn Hô̆i đong kong pơlê Dak Nông ăm ‘nâi, hneăng hôp rôh kố ai hên tơdroăng cheăng ki kal. Xua mê, rêm râ, kơvâ cheăng athế tơkŭm khât, ivá mơ-eăm hên tâ kơ mê nếo, ƀă hiâm mơno kơhnâ, troăng hơlâ pêi pro rơkê, tơƀrê, tơtro ƀă tung pơla ai pơreăng COVID-19 tâ tú, pro ôh tá tơniăn, vâ pêi pro ƀlêi chiâng mâu túa pơkâ mơnhông mơdêk cheăng kâ rêh ối pơlê pơla dêi kong pơlê.