VOV4.Sêdang - Hâi lơ 6/8, tơkŭm po Hneăng hôp mơ’no tơdrêng tung um tiô troăng hyôh măng internet tơpui ‘na tơdroăng kal ƀă tuá ki rơkê tơtro pơla Đảng Kŏng san Việt Nam ƀă Đảng Kŏng san Chi-lê. Pôa Lê Hoài Trung, Kăn cheăng tung Tíu xiâm Đảng, Kăn xiâm pơkuâ tơpui kâ Tơnêi têa kơvâ Đảng ƀă pôa Claudio de Negri, Kăn pơkuâ hnê ngăn Đảng, Kăn pơkuâ tơpui kâ kơvâ Đảng Kŏng san Chile hiăng rơtế pơkuâ.

A hneăng hôp tơpui tơno, pôa Lê Hoài Trung tối nhên, Đảng Kŏng san Việt Nam đi đo nhuô̆m, pói vâ thăm pêi pro trâu hơngế tâ tơrŭm cheăng, tơrŭm tiô khôi vâi krâ nah lĕm tro ƀă Đảng Kŏng san Chile. Tung roh tơkŭm po Hneăng hôp, mâu kăn dêi péa Đảng hiăng tơbleăng tối mâu tơdroăng chêh 'na túa ki rơkê tơtro tung mơjiâng Đảng, pêi pro kuăn pơlê pơkuâ dêi hnoăng cheăng; túa ki rơkê tung mơnhông cheăng kâ – rêh ối pơlê pơla ƀă thăm mot tơrŭm cheăng lâp plâi tơnêi tung pơla nôkố; pơkâ mâu troăng pêi ki nhên vâ thăm tơrŭm tâ mê nếo tung tơrŭm cheăng pơla péa Đảng, péa tơnêi têa tung la ngiâ.

A Sa Ly tơplôu ƀă tơbleăng