VOV4.Xơ Đăng - Khu xiâm ngăn mơhno túa lĕm tro tơ’noăng ivá ƀă ôm hyô ăm ‘nâi, hơnăm 2022, kơvâ ôm hyô pơtối tơbleăng mâu troăng hơlâ mơhnhôk, tŏng kum rế hía rế ‘mâi mơnhông tơdroăng cheăng ôm hyô, tíu ki djâ tơmối rế hbrâ mơdât pơreăng ƀă pơreăng kân COVID-19. Tiah mê, Khu xiâm ngăn mơhno túa lĕm tro tơ’noăng ivá ƀă ôm hyô mơnhên 5 tơdroăng cheăng, troăng hơlâ vâ rế hía rế lôu péa pêi cheăng, tê mơdró ôm hyô vêh tiah hmâ tung la ngiâ, tung mê kal pêi pro hdrối cho athế rak tơniăn hbrâ mơdât pơreăng COVID-19; tŏng kum khu mơdró kâ mơdêk rĕng tơdroăng ki ‘mâi mơnhông ƀă tŏng kum mơnhông mâu kơxô̆ liăn vâ pêi pro châ tiô tơdroăng ki rơhêng vâ ‘mâi mơnhông ôm hyô.

Pơtối pro ton pêi pro mâu troăng tơdroăng ki kơdroh, ôh tá êa nâp hnoăng liăn mơhá, kơxô̆ liăn; tŏng kum liăn laih mung ing hngêi rak liăn ƀă khu mơdró kâ ‘no liăn cheăng pêi cheăng mơnhông ôm hyô; kơjo kum khu mơdró kâ ôm hyô pơxiâm pêi cheăng ƀă hên tơdroăng ki ê. ‘Na tơdroăng ki rak tơniăn a tíu troh ƀă tơniăn ăm tơmối ôm hyô, tiô pôa Vũ Đức Đam, Ngế pro xiâm phŏ hnê ngăn tơnêi têa kal pêi pro tro tơdroăng hbrâ mơdât pơreăng, séa ngăn tro pơreăng tung pơla iâ hâi má môi vâ lôu péa krá tơniăn.

Katarina Nga tơplôu ƀă tơbleăng