VOV4.Sêdang - Hơnăm hriâm nếo 2021 – 2022 hiăng vâ chê troh, laga pơreăng pơtối xông tâ tú ó a hên kong pơlê, pơlê kong kơdrâm, ing mê hiăng pơkâ troăng vâ pơxiâm po hơnăm hriâm nếo mơ’no tơdrêng tung um tiô troăng hyôh Internet ƀă hnê hriâm mơ’no tơdrêng tung um. Ƀă hok tro râ má péa, râ má pái kô chôa ‘lâng hmâ ƀă rĕng hmâ ƀă hriâm mơ’no tơdrêng tung um tiô troăng măng Internet tung hơnăm hriâm nếo. Laga ƀă râ hriâm má môi, hên nôu pâ xuân tô tuăn ăm ‘’tơdroăng ki pơ’lêh ki kal’’ apoăng dêi kuăn ‘nĕng tơná.

Vâ hlê plĕng nhên tâ tơdjâk dêi pơreăng troh mâu vâi o hok tro lâm 1 ƀă hnê mơhno dêi Khu xiâm pơkuâ hnê hriâm ƀă hnê mơjiâng tuăn ngôa rơkê, Ngế chêh hlá tơbeăng cheăng tung Rơ’jíu Việt Nam ai tơpui ƀă pôa Thái Văn Tài, kăn pơkuâ hnê hriâm râ má môi, ối tung Khu xiâm ngăn ‘na hnê hriâm ƀă hnê mơjiâng tuăn ngôa rơkê tơnêi têa.

-Ô pôa, pơreăng COVID-19 dế hlo tâ tú rế rơ-iô hên a kong pơlê, pơlê kong kân.  Mâu kong pơlê, pơlê kong kân pơkâ hâi lăm troh a hngêi trung a lơ 1/9, ‘na mâu kong pơlê oh tá lĭng po tiô hâi pơkâ hdrối vâ troh a hngêi trung xua hâi ‘nâi hdrối ki rơ-iô dêi pơreăng COVID-19. Pôa tối ăm ‘nâi tơdroăng pơkâ hơnăm hriâm dêi hok tro râ má môi, malối cho hok tro lâm 1 tro tơdjâk môi tiah lâi?

Pôa Thái Văn Tài:  “Tung tơdroăng pơkâ hâi khế hơnăm hriâm mê Khu xiâm ngăn hnê hriâm ƀă hnê mơjiâng tuăn ngôa rơkê hiăng tơmiât nhên trối hâi khế hơnăm hriâm hơnăm kố ƀă râ má môi ƀă lâm 1 môi tiah lâi. Krê ƀă râ má Môi mê mâu kong pơlê thế tơmiât nhên ƀă rơkê ƀĕng beăng tung hên tơdroăng tâ. Tung hnoăng pơkuâ dêi Vi ƀan kong pơlê kô chiâng pơkâ hâi pơxiâm lăm troh a hngêi trung ƀă hâi ki tâi hơnăm hriâm, tung pơla dế ôh tá ai pơreăng rĕng tâ lơ hrá tâ tâng pơchông ƀă hâi khế pơkâ hơnăm hriâm ai 15 hâi.

Tiah mê, ƀă hâi khế môi tiah mê, mâu kong pơlê kô chiâng pơkâ hâi khế ăm mâu vâi o hok tro lăm troh a hngêi trung hriâm a tơrêm kong pơlê kô pơkâ nhên, thăm nếo tiô kơ tơrêm hngêi trung. A kơpong ki lâi, tíu ki lâi ôh tá ai pơreăng mê pơtối ăm hok tro lăm hriâm a hngêi trung. Mâu tíu ki lâi dế nhôm tơ’lêi tâ tú mê pin thế ăm pơtê ‘nôi vâ rak vế ivá ƀă vâ tơniăn ăm mâu vâi o. 

Xua mê, ƀă mâu vâi o hok tro lâm 1 pakĭng tơdroăng pro tơniăn hâi lăm hriâm mâu ƀai hriâm dêi mâu vâi o hok tro lâm 1 pin thế kơchăng tơmâng ngăn khât ki tơ-ƀrê ƀă ‘na tuăn tơmiât hâi hbrâ rơnáu ăm tơdroăng hriâm, pơ’lêh tíu hriâm ing mầm non to râ má môi.

-Môi tiah pôa nếo tối mê âi, hok tro lâm 1 cho mâu ngế ki ối  tơxĭn. Vâi o pơ’lêh tíu hriâm ing mầm non to râ má môi la a mâu kong pơlê tơring ki ‘nâ vâi o dế tro tơdjâk pơreăng COVID-19 mê vâi hâi châ rơtế ƀă thái, cô ƀă vâi pú vâ lăm troh a hngêi trung.  Tiah mê, Khu xiâm ngăn ‘na hnê hriâm ai hnê pơchân tơdroăng klâi ƀă mâu vâi o hok tro  lâm 1 tung hơnăm hriâm kô, ô pôa?

Pôa Thái Văn Tài, Ngế xiâm ngăn Hnê hriâm râ má môi, Khu xiâm ngăn ‘na hnê hriâm ƀă hnê mơjiâng tuăn ngôa rơkê

Pôa Thái Văn Tài:  ‘’ ‘Na tơdroăng cheăng, pin hiăng pơtroh  hlá mơ-éa hnê mơjiâng pơkâ ăm hngêi trung, pơkâ tung hơnăm hriâm. Ƀă thái cô mê tơdroăng pêi pro ahdrối thế hbrâ chêh pro mâu pơkâ môn hriâm, ki ahdrối cho a lâm 1 ăm mâu môn hriâm ki apoăng môi tiah môn Tiếng Việt, môn Toán. ‘Na tung pơkâ mâu môn hriâm ki ê pin tí tăng ngăn pro ti lâi vâ kơdroh chôu hriâm vâ vâi o ai chôu hriâm mâu môn ki xiâm kal tâ. Ƀă môi tơdroăng pơkâ  ki ê nếo, pin athế xúa hâi chôu pơla ôh tá ai pơreăng vâ mơdêk hnê hriâm tơdrêng ăm vâi o hok tro lâm 1.

Tâng tung pơla ai pơreăng ton hâi, hok tro ối a hngêi mê pin pêi pro tơdroăng  pơkâ “pơtê lăm troh a hngêi trung la ôh tá pơtê hriâm”. Ƀă hok tro lâm 1, lâm 2 pin thế  tơmâng troh tơdroăng hnê túa hnê hriâm ki rơkê xúa kŏng ngê̆ thong tin vâ pro ti lâi vâ tơ’lêi má môi ăm nôu pâ, tơ’lêi má môi ăm hok tro ƀă pêi pro tiô pơkâ pơtối rak vế ki hmâ hriâm. Veăng kum iâ há tung hriâm vâ vâi hmâ pơtối rak tơdroăng hriâm ƀă mâu ƀai hriâm ki xiâm, ki kal.

-Hlo pơreăng tâ tú môi tiah dế nôkố, tiô tối hdrối, hok tro kô pơtối thế hriâm tung um tivi tiô troăng hyôh internet tâng ôh tá châ lăm troh a hngêi trung. La hriâm mơ’no tơdrêng tung um tiô troăng hyôh mê ƀă hok tro râ má môi cho pá ‘nâng. Khu xiâm ngăn hnê hriâm ƀă hnê mơjiâng tuăn ngôa rơkê ai tối pơchân thế tơmâng khât ƀă mâu kong pơlê, malối a mâu tơring cheăm ki xơpá ôh tá hâi ai kŏng ngê̆ thong tin mê ti lâi, ô pôa?

Pôa Thái Văn Tài:  “Khu xiâm ngăn ‘na hnê hriam ƀă hnê mơjiâng tuăn ngôa rơkê hiăng mơjiâng môi tíu tung Internet ‘măn ƀai hnê hriâm ai 51 xô̆ vâ tơ’mô ƀă 51 ko ƀai ki vâ hnê hriâm mơ’no tiô troăng hyôh tơdrêng tung um ƀă kô châ hnê lâp tung mâu trang măng xah hô̆i vâ kum ăm mâu vâi o hok tro châ po hriâm tung pơla ối a hngêi mê pin xúa 51 tơdoăng hnê hriâm mê, kô chiâng xúa ăm tâi tâng mâu kơxop hlá mơ-éa hriâm ki pơrá phá dêi rơpó.

Ƀă thái cô,  hngêi trung kal thế hnê ăm nôu pâ tung pơla ối a hngêi thế kum ăm dêi kuăn hriâm tiếng Việt cho hriâm nâl Xuăn ing kŏng ngê̆ mê. Ki má péa nếo, cho mâu tíu xơpá mê pin thế pêi pro hên túa hnê hriâm. Kô chiâng in phĭu xing xoăng ăm hok tro, kô chiâng tơpui tơno pơla mâu tơring cheăm vâ pro ti lâi pơtối  rak ăm vâi o ‘nâi hriâm xêh.  Ƀă pin xuân ‘nâi tiah kố tâng pin pro rơkê, pro tro mê kô xuân cho rôh vâ kum ăm mâu vâi o ‘nâi tơmiât vâ hriâm xêh ƀă hlối tơrŭm ƀă nôu pâ hok tro tơrŭm ƀă pin.

Tối mơgêi, pin thế xúa hâi chôu ki châ toh pơla ôh tá ai pơreăng vâ ăm hok tro lâm 1, lâm 2 châ hriâm. Tâng ngế ki  tơviah, tâng môi to cheăm tơring ki lâi ‘lo la tung pơla hâi khế pơkâ ăm phêp mê pin ôh tá kâi klêi hnê hriâm tơdroăng pơkâ hriâm tung hơnăm, mê cheăm tơring kong pơlê ki mê thế tối tơbleăng ăm Khu xiâm ngăn hnê hriâm vâ pơtối pơkâ hâi khế hriâm. Pin thế pêi pro a hdrối ‘na tơdroăng ki tơ-ƀrê tung hnê ƀă hriâm, kum hnê ahdrối ăm mâu ối tơxĭn, ví tơdroăng pêi pro ôh tá cho khât, ví tơdroăng pêi pro bu bối ah chiâng tơdjâk troh ki tơ-ƀrê ƀă tơdroăng tơmiât ‘na hriâm dêi vâi o.

-Mơnê  kơ pôa Thái Văn Tài, Ngế xiâm ngăn ‘na hnê hriâm Râ má môi, Khu xiâm ngăn hnê hriâm ƀă hnê mơjiâng tuăn ngôa rơkê tơnêi têa!

VOV1

Gương tơplôu ƀă tơbleăng