VOV4.Sêdang - Tung mâu hâi hdrối mê hía nah, a kong pơlê Dak Lak hiăng đi đo mơnhên tối ai ngế ki tâ pơreăng COVID-19. Ƀă hiâm mơno ‘’ulâi kal ai droh rơtăm kô troh amê’’, mâu đoân viên droh rơtăm pơlê kong kơdrâm Ƀuôn Ma Thuột, kong pơlê Dak Lak dế plâ hâi plâ măng mơ’no dêi ivá mơno rơtế ƀă mâu khu râ, kơvâ cheăng tŏng kum vâ mơdât pơreăng COVID-19. Khu pơkuâ ngăn Đoân Droh rơtăm kong pơlê Dak Lak hiăng hnê mơhno mâu khu râ Đoân pơtối rak vế, pêi pro tơdroăng cheăng dêi 270 khu ki tŏng kum hbrâ, tơplâ, mơdât pơreăng COVID-19.

Gâk a bo cheăng peăng hdroh pơlê kong kơdrâm Ƀuôn Ma Thuột, tíu séa ngăn hbrâ mơdât pơreăng a kông kơxô̆ 14, troăng Hồ Chí Minh (Troăng kân 14 ki tơkâ luâ cheăm Hòa Phú) rêm hâi măng tơdah lối rơpâu ngế mot pro mơéa chêh tối ‘na châ chăn. Rơtế ƀă mâu khu lêng ki ê, mâu đoân viên droh rơtăm ki pleăng dêi hnoăng cheăng veăng gâk, hnê xing xoăng, tŏng kum kuăn pơlê pro hlá mơéa chêh tối ‘na ivá ƀăm chêh ‘mot tung kơmăi.Ngoh Y Phong Êban, ngế pơkuâ ngăn Đoân cheăm Hòa Phú, pơlê kong kơdrâm Ƀuôn Ma Thuột ăm ‘nâi:

“Mâu droh rơtăm dêi cheăm mê veăng sap ing kơxê hâi lơ 31/5 drêng pơxiâm ai tíu gâk séa ngăn pơreăng a troăng kân 14 a cheăm. Klêi kơ’nâi rôh pơreăng tâ tú ki nếo má môi kố a pơlê kong kơdrâm Ƀuôn Ma Thuột xuân ai pơkâ thế Khu pơkuâ ngăn Đoân droh rơtăm pơlê kong kơdrâm Ƀuôn Ma Thuột pơtroh tơ’nôm mâu đoân viên a mâu tíu pêi cheăng dêi kơpong kơxô̆ 1. Nôkố rêm tíu pêi cheăng pơtroh 3 ngế gâk tung môi kâ. Veăng a kố klêi mê mâu vâi pú ki mê xuân klâ krê xêh a hngêi”.

Khu droh rơtăm veăng gâk a mâu tíui gâk séa ngăn pơreăng a kông 14.

Rơtế a droh rơtăm cheăm, a tíu gâk kông 14 ối ai 8 ngế droh rơtăm ki mơhnŏng lăm veăng xêh dêi pơlê kong kơdrâm Ƀuôn Ma Thuột troh veăng. Nâ Trần Thị Huyền Thương, đoân viên Hngêi trung Kao đăng Công nghê̆ Tây Nguyên, tối:

“Xua kuăn pơlê vêh plâ hâi plâ măng pơtối hlối mê mâu vâi pú athế pêi cheăng plâ hâi plâ măng ƀă athế xing xoăng ca gâk. Tơdroăng ki ôu kâ, ối pơtê dêi mâu vâi pú ki hên cho ối pơtê a kố hlối. Xuân ôh tá tơ’lêi hlâu klâi, la ƀă hiâm mơno hơnăm ối nếo mơeăm veăng kơhnâ mê ngin xuân mơeăm môi hiâm mơno ƀă veăng tơdjuôm ivá rơtế ƀă khu pơkuâ, rơtế ƀă tơnêi têa tơdjuôm ivá hbrâ mơdât pơreăng ƀă rơhêng vâ pin kô kâi hbrâ mơdât pơreăng kân kố”.

Nôkố, tâi tâng 21 to cheăm, bêng dêi pơlê kong kơdrâm Ƀuôn Ma Thuột pơrá hiăng tơkŭm po nếo tơdroăng droh rơtăm djâ troăng ahdrối, pêi pro tối tơbleăng hbrâ mơdât pơreăng ămkuăn pơlê,tŏng kum gâk mơdât a kơpong ki mơdât mot lo, tíu gâk séa ngăn pơreăng a mâu troăng, ƀă tơdah xo, xing xoăng mâu kế tơmeăm kum kuăn pơlê ƀă mâu khu lêng kơpong ki tro mơdât mot lo ƀă hên ki ê. Nâ Nguyễn Tuyết Sinh, ngế phŏ pơkuâ Đoân bêng Thành Công, pơlê kong kơdrâm Ƀuôn Ma Thuột, Dak Lak ăm ‘nâi:

“Ngin xuân rơhêng vâ tơdjâk môi tơdroăng cho nôkố pơreăng gá tơpá mê mâu vâi pú đoân viên droh rơtăm a pơlê kong kơdrâm ai hiâm mơno veăng pleăng hnoăng vâ mot tung đô̆i droh rơtăm djâ troăng ahdrối dêi pơlê kong kơdrâm, drêng pơlê kong kơdrâim ai krếo tơkŭm mê pin chiâng vâ châ ceăng pêi pro tro tâ”.

Đoân viên droh rơtăm veăng tơdah xo ƀă xing xoăng kế tơmeăm ăm mâu kơpong ki tro mơdât mot lo

Tiô nâ H Hương Ƀuôn Krông, phŏ pơkuâ ngăn Đoâm droh rơtăm pơlê kong kơdrâm Ƀuôn Ma Thuột, tung tơdroăng pơreăng tâ tú rơ-iêo, sap ing mơ’nui khế 5 nah troh nôkố, Khu pơkuâ ngăn Đoân pơlê kong kơdrâm Ƀuôn Ma Thuột xuân krếo thế veăng tơlo kum mâu kế tơmeăm ăm kuăn pơlê tung mâu kơpong ki klâ krê, mơdât mot lo ƀă mơhnhôk mâu khu ki dế pêi dêi hnoăng cheăng. Rơtế môi hiâm mơno “hbrâ mơdât pơreăng môi tiah tơtrâ xâ”, pleăng dêi tơdroăng cheăng, hâi măng rơtế ƀă khu pơkuâ ƀă mâu khu ki ai tơdjâk troh vâ pêi pro hnoăng cheăng séa ngăn, tăng hlo, klâ krê, vê hdró kơpong hbrâ mơdât pơreăng xuân môi tiah tối tơbleăng, mơhnhôk kuăn pơlêpêi pro kơtăng mâu troăng hbrâ mơdât pơreăng.

“La ngiâ ah, mê Khu pơkuâ ngăn Đoân droh rơtăm pơlê kong kơdrâm xuân môi tiah Khu ki tơrŭm droh rơtăm Việt Nam pơlê kong kơdrâm kô tơbleăng mâu tơdroăng ki tŏng kum. Má môi cho krếo thế mơhnhôk mâu đô̆i droh rptăm ki pleăng dêi tơdroăng cheăng a tíu gâk Hòa Phú, chêh tơkŭm kơxô̆ ngế đoân viên droh rơtăm ƀă mâu phô̆m vâ xông kân ai mâ a mâu kơpong ki mơdât mot lo a tíu kuăn pơlê rêh ối a pơlê kong kơdrâm, séa ngăn vâ mơhnhôk tŏng kum. Má péa cho krếo thế vâ mơhnhôk mơjiâng “Hơpiâp on kong măng”. Rôh pơreăng tâ tú hơnăm 2020, mê khu “hơpiâp on kong măng”kố xuân pêi cheăng tơƀrê tung tơdroăng ki tŏng kum pế pơchên mâu hmê kâ ăm mâu khu ki pêi cheăng a mâu tíu mơdât mot lo a pơlê kong kơdrâm”.

Rơtế prôk ƀă hơnăm ối nếo pơlê kong kơdrâm Ƀuôn Ma Thuột, a chê kố, Khu pơkuâ ngăn Đoân droh rơtăm pơlê kong kơdrâm rơtế ƀăe Kŏng an kong pơlê Dak Lak tơrŭm ƀă Khu pơkuâ ngăn Đoân droh rơtăm pơlê kong kơdrâm Ƀuôn Ma Thuột rơtế ƀă mâu khu ki ai tuăn hiâm hơ-ui tŏng kum kế tơmeăm lămpôu, mơhnhôk ƀă hbru lối rơpâu to kơ’lo têa, lối châ kơthung xup kơxŏng khăng, lối hrĭng to kơtâ í ƀă mâu kế tơmeăm ki hbrâ mơdât pơreăng ăm khu lêng ki pêi pro hnoăng cheăng hbrâ mơdât pơreăng a 4 tíu gâk a cheăm Hòa Phuhs, Čư̆ Êbur, tíu ki klâ ối krê tơkŭm a tíu ăm mâu sinh viên Hngêi trung kao đăng Công nghê̆ ối, a hơlâ troăng Hà Huy Tâpj ƀă Kŏng an bêng Tân An, pơlê kong kơdrâm Ƀuôn Ma Thuột.

Hlo tơdroăng pơreăng Covid-19 tâ tú rơ-iêo, Khu pơkuâ ngăn Đoân droh rơtăm kong pơlê Dak Lak hiăng pơkâ thế rêm râ Đoân pơtối rak vế tơdroăng cheăng dêi 270 khu tŏng kum hbrâ mơdât pơreăng Covid-19; pêi pro tiô tơdroăng ki hnê mơhno dêi Vi ƀan hnê ngăn kong pơlê Dak Lak tung pêi pro mâu troăng hơlâ hbrâ mơdât pơreăng. Tung mê, tơkŭm mơdêk hnoăng cheăng hnê tối mơhnhôk kuăn pơlê pêi pro mâu tơdroăng ki hbrâ mơdât pơreăng Covid-19 ƀă tơdroăng cheăng môi tiah: hbru kên pâng môh rơkong, têa kơdê pơreăng tê kơtê ăm kơpong klâ krê, tíu ối tơdjuôm; tŏng kum liăn, kế tơmeăm kalxúa ăm kăn ƀô̆ lêng ƀă mâu ngế a kơpong klâ krê; kum kuăn pơlê chêh tối dêi châ chăn, hbru hlá mơéa hnê tối, tŏng kum chêh tối ivá, gâk kring tơniăn a mâu tíu gâk hbrâ mơdât pơreăng.

H Xíu VOV Tât Nguyên

Katarina Nga tơplôu ƀă tơbleăng