Hơnăm 2023, lâp tơnêi têa ai 82 ngế hlâ xua pơreăng kôk rơxok, krê kong pơlê Tây Nguyên ai 20 ngế, tung mê, kong pơlê Gia Lai 14 ngế ƀă Dak Lak 4 ngế. Tung 3 khế apoăng hơnăm, lâp tơnêi têa ai 27 ngế hlâ xua pơreăng kôk rơxok, krê Dak Lak ai 4 ngế, Gia Lai 2 ngế. Tơdrêng amê, tŭm 2 kong pơlê kố dế kơxô̆ pâk vaccine hbrâ mơdât pơreăng iâ má môi kơpong, Gia Lai bu pâk hbrâ mơdât châ lối 19% ƀă Dak Lak nếo châ lối 37%.

Tiô pôa Viên Chinh Chiến, Kăn pơkuâ Viê̆n Vê̆ sinh dĭch teh Tây Nguyên, tơdroăng pơreăng kôk rơxok pơtối ai ƀă pro pơreăng a mơngế tung la ngiâ cho hên drêng Tây Nguyên dế mot rơnó tô. Xua mê, mâu kong pơlê kal kơtăng tung tơdroăng pơkuâ ngăn khu chó, miếo; mơdêk rĕng tơdroăng pâk vaccine hbrâ mơdât pơreăng kôk rơxok ƀă thăm pơtâng tối vâ kuăn pơlê hlê plĕng tơdroăng ki rơ-iô dêi pơreăng kố.