Hơnăm 2023 kong pơlê Dak Lak ai 8 ngế tro pôu ‘mêi kế kâ, 86 ngế tro, tung mê ai 77 ngế pơlât tung hngêi pơkeăng, tâk 5 ngế ƀă tâk 68 ngế tro tâng vâ pơchông ƀă hơnăm 2023. Tơdế kơxô̆ ngế tro pôu ‘mêi kế kâ cho xua kuăn pơlê xúa kế kâ mâu hơ’nêh mâ ki ai hlâu ki ‘mêi. Khế pêi pro xua tơniăn krúa kế kâ hơnăm 2024, po ing hâi lơ 15/4 troh 15/5 tung lâp kong pơlê ƀă inâi ‘Pơtối rak vế tơniăn kế kâ tung tơdroăng nếo”.

Jâ Lê Thị Châu, ngế xiâm ngăn Tơniăn krúa kế kâ kong pơlê Dak Lak ăm ‘nâi, Khế pêi pro cho tơdroăng ki xiâm tung hơnăm, pro chiâng rôh ki kal, tơbleăng tơdroăng kố ing um tơvi, rơ’jíu ‘na pêi pro kơtăng mâu pơkâ luât ‘na tơniăn krúa kế kâ tung mâu tơdroăng ki mơjiâng bro, tê mơdró kế kâ.