Ki vâ tối, hên ngế vâi hdrêng mot pơlât tung châ hiăng râ ó xua nôu pâ tơngôu ôh tá rĕng tơmâng. A Khoa Nhi tổng hợp, Hngêi pơkeăng kân kơpong Tây Nguyên, vâi hdrêng mot pơlât a hngêi pơkeăng xua châi klêa pơyâng lo têa ai tŭm hơnăm, ki hên vâi hdrêng pá xôp 5 hơnăm.

Sap apoăng hơnăm kố, ai dâng 500 ngế hdrêng châi klêa lăm khăm pơlât a kơvâ pơlât kố. Mâu hâi achê kố, kơxô̆ vâi hdrêng mot pơlât a hngêi pơkeăng xua châi klêa tâk hên, sap 20 - 25 ngế rêm hâi. Ƀă kơxô̆ vâi hdrêng châi klêa rế hía rế hên cho vâ tơbleăng hdrối ăm nôu pâ thế kơchăng ngăn krâu khât dêi kuăn ‘nĕng tơtrŏng tâ tung tơdroăng hbrâ mơdât châi klêa pơyâng lo têa a vâi hdrêng, xua châi klêa lăm dế lo têa mê ki xiâm má 2 pro hlâ hên a vâi hdrêng pá xôp 5 hơnăm.