VOV4.Sêdang - Tung rôh lăm pôu Việt Nam drêng troh leh tơbâ 50 hơnăm tơrŭm cheăng tơpui kâ pơla Việt Nam - Swiss, Kăn xiâm phŏ pơkuâ kong têa, Ngế xiâm tơpui kâ kong têa Swiss cho Ignazio Cassis hiăng tơpui tơno ƀă jâ Võ Thị Ánh Xuân, Kăn xiâm phŏ hnê ngăn tơnêi têa. A rôh tơdah, jâ Võ Thị Ánh Xuân tối phiu ro hlo tơdroăng mơnhông tơrŭm cheăng pơla péa tơnêi têa, thế péa pâ pơtối tơrŭm trâu tâ nếu, tơ-ƀrê tâ nếo, tro khât tâ, ai tiô púi vâ pơxúa tŭm péa tơnêi têa, hlối veăng mơnhông hơniâp lĕm, tơniăn ƀă hlối tơrŭm a kơpong ƀă tung lâp plâi tơnêi.

Jâ Võ Thị Ánh Xuân, Kăn xiâm phŏ hnê ngăn tơnêi têa pin tơdah kăn xiâm phŏ pơkuâ kong têa Swiss

Pôa Ignazio Cassis, Kăn xiâm phŏ pơkuâ kong têa Swiss khĕn kơdeăn khât ki kơdôu mơ-eăm ƀă veăng kum mâu ki xơpá dêi Việt Nam tung mê hbrâ ví roh tâ tú COVID-19, tơbleăng thế Chin phuh Swiss pơkâ tŏng kum tơdrêng ăm Việt Nam 500 rơpâu kơmăi kit khăm pơreăng rĕng, ăm 300.000 to kên pâng môh rơkong ki mơdât pơreăng ƀă 30 toăng kơmăi hiâm ôxy, tâi tâng kơnâ dâng 120 rơtal liăn Việt Nam.

Guơng tơplôu ƀă tơbleăng