VOV4.Sêdang - Pêi cheăng ƀă Tíu xiâm chêh ‘măn tơdroăng kuăn pơlê tơnêi têa ‘na tơdroăng kuăn pơlê rêh ối, Kơ koan xiâm Kan sát pơkuâ mơ-éa ‘na tơniăn pơlê pơla, Khu xiâm pơkuâ Kŏng an tung kơxê lơ 27/8, pôa Vương Đình Huệ, Kăn xiâm hnê ngăn Kuô̆k hô̆i tối nhên, tíu chêh ‘măn tơdroăng tơnêi têa ‘na kuăn pơlê rêh ối cho tơmeăm tơnêi têa, xua mê, kal pơkuâ, pêi pro, xúa, mơnhông ki kơnâ dêi tíu chêh ‘măn tơdroăng kuăn pơlê kố vâ kum tung mơnhông mơdêk cheăng kâ – rêh ối pơlê pơla dêi tơnêi têa.

Laga nôkố, lâp tơnêi têa dế pêi pro mâu troăng ki thâ hbrâ mơdât pơreăng. Pôa Vương Đình Huệ pơkâ thế, Khu xiâm pơkuâ Kŏng an pơtối hnê mơhno tâi tâng khu cheăng mơnhông hnoăng cho khu ki ối a ko tung tơdroăng hbrâ mơdât pơreăng COVID-19, thăm rơtế khu râ kăn cheăng kal kí mơdât, troh tah pơreăng tung pơla ƀeăn má môi, rĕng má môi.

Ƀă hnoăng cheăng mơjiâng chêh tơdroăng kuăn pơlê tơnêi têa ‘na kơpong kuăn pơlê rêh ối; pêi kâ, pro ăm ƀă pơkuâ căn cước kuăn pơlê, pôa Vương Đình Huệ tối rơdêi, tíu chêh ‘măn tơdroăng kuăn pơlê tơnêi têa ‘na kơpong kuăn pơlê rêh ối cho tơmeăm tơnêi têa. Xua mê, kal pơkuâ, pêi pro, xúa, mơnhông tâi tâng ki kơnâ dêi tơdroăng chêh ‘măn tơdroăng kuăn pơlê kố vâ kum mơnhông mơdêk cheăng kâ – rêh ối pơlê pơla dêi tơnêi têa.

A Sa Ly tơplôu ƀă tơbleăng