VOV4.Sêdang - Tơpui a rôh pêi cheăng ƀă Khu séa ngăn liăn ngân tơnêi têa a kơxê lơ 12/8, pôa Vương Đình Huệ, kăn xiâm hnê ngăn Kuô̆k hô̆i pơkâ thế, ki kal dêi hơnăm 2022 dêi Khu séa ngăn liăn ngân tơnêi têa cho pêi pro tơdroăng ki tối tơbleăng mơgêi tơdjâk troh pêi pro kơdĭng, hbrâ mơdât mơhrê liăn ngân tê kơtê hneăng hơnăm 2016 – 2021 tung mâu kơvâ cheăng môi tiah kế tơmeăm tơdjuôm, kong kế tơmeăm khoăng, tơnêi tơníu. Mơnhên tối khât hnoăng cheăng dêi Khu séa ngăn liăn ngân tơnêi têa tung pơla hdrối kố nah, pôa Vương Đình Huệ tối tiah kố, kơvâ séa ngăn liăn ngân hiăng tơmâng xo mâu tơdroăng ki rơkê plĕng dêi kong têa ê, xúa rơkê tung tơdroăng ki ai khât dêi Việt Nam, ki rơkê plĕng ‘na séa ngăn liăn ngân rế hía rế tâk, mơjiâng tíu rế hía rế hên, cho kơ koan séa ngăn kế tơmeăm tơdjuôm ai hnoăng cheăng pôu râng, loi tơngah. Tung la ngiâ ah, kăn xiâm hnê ngăn Kuô̆k hô̆i Vương Đình Huệ pơkâ thế, khu pơkuâ ngăn Đảng Séa ngăn liăn ngân tơnêi têa kal mơjiâng tơdroăng tơkêa pêi klêi tơkŭm mơdêk ki tơƀrê pêi cheăng dêi Khu séa ngăn liăn ngân tơnêi têa, xing xoăng túa pơkâ tơbleăng tung la ngiâ séa ngăn liăn ngân tơnêi têa troh hơnăm 2030, pơkâ tung tơdroăng ki tâi tâng pêi pro tơdroăng pơkâ rôh má 13 dêi Đảng ƀă mâu tơdroăng pơkâ ki ai tơdjâk tung 5 hơnăm la ngiâ.

Nga tơplôu ƀă tơbleăng