VOV4.Sêdang - Hâi lơ 6/9, a Ƀơrô cheăng tê mơdró Áo, pơlê kong xiâm Vienna hiăng po hneăng hôp khu mơdró Việt Nam ƀă Áo xua kăn teăng mâ Việt Nam, Khu xiâm ngăn Pơkâ ƀă ‘no Liăn cheăng ƀă Ƀơrô ngăn tê mơdró cheăng kâ Kŏng hò Áo tơkŭm po. Ai hên mâu khu mơdró Việt Nam ƀă kăn teăng ma lối 20 khu mơdró tung mâu kơvâ cheăng ‘na liăn ngân, hngêi rak liăn, ‘na ngăn pơkeăng, ’na hnê tối mâu tơdroăng, ‘na troăng prôk, ô tô, tơmeăm ki vâ kring gak, hbrâ mơdât on chếo, ‘na hriăn mơ’no tah têa ‘mêi ing hngêi pơkeăng, ‘na tah ki ‘mêi dêi mâu túa meăm, tê mơdró, ‘na luât, ôm hyô ‘na troăng tơ-ƀai, ‘na on tơhrik hiăng troh veăng hôp.

Tơpui a hneăng hôp, pôa Vương Đình Huệ, Kăn xiâm hnê ngăn Kuô̆k hô̆i tối nhên, Việt Nam púi vâ, mâu khu mơdró dêi kong têa Áo, Ƀơrô ngăn tê mơdró ‘na kơmăi kơmok ki vâi ô eăng hnan thế rĕng kĭ tơdroăng Tơhrâ rak tơniăn ‘na tơdroăng ‘no liăn cheăng. Nôkố, Áo ai 37 tơdroăng tơkêa bro tung tâi tâng kơxô̆ liăn ‘no dâng 150 rơtuh dollars, tơkŭm hên cho kơvâ pêi cheăng ƀă kơmăi kơmok hriăn pro tơmeăm ‘na khoa hok kơmăi kơmok.

Tối ‘na tơdroăng tơrŭm cheăng tê mơdró, Áo đi đo cho môi tung mâu kong têa ki rôe tơmeăm dêi  Việt Nam ƀă nôkố dế cho tung khu 5 to kong têa ki kân dêi Việt Nam tê tơmeăm ăm kong têa ê tung khu EU. Pôa Vương Đình Huệ, Kăn xiâm hnê ngăn Kuô̆k hô̆i xuân púi vâ, khu mơdró Áo veăng kum vâ chin phuh Áo veăng kum vaccine, mâu tơmeăm khăm pơlât, kum Việt Nam hbrâ mơdât pơreăng.

Gương tơplôu ƀă tơbleăng