VOV4.Sêdang - Kơxê lơ 28/7, hâi pêi cheăng má mơ’nui dêi hneăng hôp má môi, Kuô̆k hô̆i hiăng têk kŏng môi tuăn tơbleăng ăm pêi pro Pơkâ rah xo mâu kăn tung Chin phuh hneăng Kuô̆k hô̆i hneăng XV, ai 27 ngế: Ngế pro xiâm hnê ngăn Chin phuh; 4 Ngế xiâm phŏ hnê ngăn Chin phuh; 18 Ngế xiâm ƀă 4 kăn pơkuâ kơ koan râ xiâm. Kơxê măng lơ 28/7, pôa Nguyễn Xuân Phúc, Kăn xiâm hnê ngăn tơnêi têa hiăng diâp pơkâ rah xo mâu kăn tung Chin phuh.

Kăn xiâm hnê ngăn tơnêi têa diâp pơkâ rah xo ăm mâu kăn cheăng tung Chin phuh

Xông tơpui a roh leh, teăng mâ Khu râ kăn pơkuâ Đảng, Tơnêi têa rơkâu pôa Phạm Minh Chính, Ngế pro xiâm hnê ngăn tơnêi têa, mâu Ngế xiâm phŏ hnê ngăn Chin phuh, mâu Ngế xiâm ƀă kăn pơkuâ kơ koan râ xiâm, pôa Nguyễn Xuân Phúc mơnhên, sap ing roh rah xo tŭm mâu kăn xiâm pơkuâ Tơnêi têa troh nôkố, mơhé ôh tá ai hên chôu laga tâi tâng mâu kăn tung Chin phuh xua pôa Phạm Minh Chính pơkuâ djâ hiăng teăm tơdrêng, pêi pro ó rơdêi, tơdâng tơ’mô mâu troăng hnê mơhno, pơkuâ; pơtối mơhno môi khu pú hên ƀeăn, ƀĕng, rơkê, pêi kơtăng.

A Sa Ly tơplôu ƀă tơbleăng