VOV4.Sêdang - Kơxê lơ 29/7, a Pơlê kong kân Hồ Chí Minh, pôa Nguyễn Xuân Phúc, kăn xiâm hnê ngăn tơnêi têa hiăng lăm pôu Đảng ƀô̆, kuăn pơlê Pơlê kong kân Hồ Chí Minh dế mơ-eăm hbrâ mơdât pơreăng COVID-19, tung mê ai péa tơring Hóc Môn ƀă Củ Chi. Kăn xiâm hnê ngăn tơnêi têa xuân hiăng mơhnhôk khu ki tŏng kum ăm rêm tơring 5 rơtal liăn mâ, 5 toăng kơmăi hiâm. Tối tiah kố, tâng ôh tá pêi pro tơdroăng pơkâ 16 tung 2 măng tĭng hdrối nah, Pơlê kong kân Hồ Chí Minh mơni kô trâm xơpá hên tâ, kăn xiâm hnê ngăn tơnêi têa pơkâ thế kuăn pơlê dêi Pơlê kong kân pơtối pêi pro kơtăng tơdroăng pơkâ kố.

Pôa Nguyễn Xuân Phúc pơkâ thế Pơlê kong kân mơdêk hiâm mơno tơrŭm, pơtối mơjiâng mâu tôh hbrâ mơdât pơreăng COVID-19 a pơlê kong kân vâ lăm prôk troh a mâu troăng, mâu hơlâ troh a rêm hngêi, séa ngăn kơ rêm ngế, rĕng châ hlo, tăng hlo, vê hdró kơpong ki ai pơreăng vâ hbrâ mơdât pơreăng.

Xuân a kơxê lơ 29/7, a Pơlê kong kân Hồ Chí Minh, pôa Nguyễn Xuân Phúc lăm pôu ƀă pêi cheăng a Kŏng ti tơlo liăn Kong ngê̆ sinh hok yươk Nanogen, tíu pêi cheăng dế tung pơla mơnúa ngăn vaccine Nanocovax. Kăn xiâm hnê ngăn tơnêi têa pơkâ thế Khu xiâm ngăn pơkeăng ƀă khăm pơlât pro tơ’lêi hlâu ‘na tơdroăng ki chêh pro hlá mơéa ăm Kŏng ti mơnúa vaccine hneăng má 3, la xuân athế rak vế tro tơdroăng, xua tơdjâk tơdrêng troh ivá kuăn pơlê.

Kăn xiâm hnê ngăn tơnêi têa xuân pơkâ thế Kŏng ti Nanogen pôi tá la lâi pơtê pêi klêi ‘na kong ngê̆, mơjiâng pro vaccine ki dâi lĕm, kơdroh khât tơdroăng ki trâm ôh tá mơhúa. Pakĭng kum tung tơnêi têa mê athế tơmiât troh tơdroăng ki vâ hngế tâ cho tê ngi kong têa ê.