VOV4.Sêdang - Kơxo lơ 26/8, a Hà Nội, Khu hnê mơhno ‘mâi rơnêu luât Tơnêi têa hiăng hôp roh má 13 ing pơkuâ dêi pôa Nguyễn Xuân Phúc, Kăn xiâm hnê ngăn Tơnêi têa, Kăn pơkuâ hnê mơhno vâ tơpui tơno, tối ‘na mâu tơdroăng pêi pro Tơdroăng tơkêa bro: ‘’Pơ’lêh nếo ƀă pêi kêi đeăng troăng pêi kuăn pơlê veăng tơleăng a Hngêi tơleăng tơxâng tiô pơkâ ‘mâi rơnêu luât’’ ƀă ‘’Tơbleăng pâ tơpui tối ‘na troăng hơlâ tơbleăng Pơkâ tơkŭm po roh tơleăng mơ’no tơdrêng tung um tiô troăng măng internet a Hngêi tơleăng’’.

Kố cho péa tơdroăng xiâm xua Khu kăn ƀô̆ Đảng Hngêi tơleăng kuăn pơlê râ xiâm tơpui tơno xo rơkong tơpui tối dêi Khu hnê mơhno ‘mâi rơnêu luât Tơnêi têa tơpui tối ahdrối tơbleăng mâu kơ koan ai hnoăng séa ngăn pơkâ, ƀă la ngiâ pêi pro ‘mâi rơnêu luât tung la ngiâ. Klêi kơ’nâi tơmâng rơkong tơpui tối dêi mâu mâu kăn tung Khu hnê mơhno, pôa Nguyễn Xuân Phúc mơnhên kal pơtối hlê plĕng pêi pro pơkâ pơ’lêh nếo tiô Pơkâ hneăng hôp XIII ki ahdrối cho khu luât.

Khu chêh tôm xo rơkong tơkŭm tŭm mâu tơdroăng tơpui tối, veăng tơpui tơno vâ rĕng ai tơbleăng mơgêi, ahdrối cho Pơkâ tơkŭm po roh tơleăng mơ’no tơdrêng tung um tiô troăng măng internet a hngêi tơleăng; ing mê pro tơ’lêi hlâu ăm tơdroăng tơleăng mơ’no tơdrêng tung um tiô troăng măng internet kô rĕng pêi pro păng ‘nâng.

A Sa Ly tơplôu ƀă tơbleăng