VOV4.Sêdang - Klăng Hneăng hôp roh má môi Khu tơrŭm pơxiâm tăng cheăng pêi Tơnêi têa dó inâi VINEN, pôa Nguyễn Xuân Phúc, Kăn xiâm hnê ngăn tơnêi têa hiăng pơtroh kơthô rơkâu Hneăng hôp má môi Khu tơrŭm pơxiâm tăng cheăng pêi Tơnêi têa. Pôa Nguyễn Xuân Phúc tối nhên, thăm mơnhông pơxiâm tăng cheăng pêi cho môi tung mâu tơdroăng ki kal má môi dêi tơdroăng pơ’lêh nếo tung kơvâ cheăng kâ a Việt Nam.

Kăn xiâm hnê ngăn tơnêi têa tối ăm ‘nâi, 5 hơnăm hdrối, pơxiâm po hneăng hơnăm 2016 – 2021, Chin phuh hiăng pơkâ hơnăm 2016 cho hơnăm Tơnêi têa pơxiâm tăng cheăng pêi. Ing mê, tơdroăng pơxiâm tăng cheăng pêi troh lâp lu, tíu mơ’no liăn tê mơdró châ pơ’lêh, lối 100 rơpâu khu tê mơdró châ mơjiâng nếo rêm hơnăm ƀă troh nôkố tơnêi têa pin hiăng ai lối 800 rơpâu ngế tê mơdró dế pêi cheăng.

Kăn xiâm hnê ngăn tơnêi têa pói vâ Khu pơxiâm tăng cheăng pêi Tơnêi têa kô chiâng kông ki tơdjêp châ tơƀrê pơlê pơla pơxiâm tăng cheăng pêi, kum pro ăm hâk vâ tăng troăng pơxiâm tê mơdró, mơjiâng mơngế tê mơdró, tŏng kum, pêi pro mâu tơdroăng pói vâ pơxiâm tăng cheăng pêi a Việt Nam.

A Sa Ly tơplôu ƀă tơbleăng