VOV4.Sêdang - Xuân tung rôh lăm pôu tơrŭm tơroâ păng ‘nâng Kŏng hòa Yân chuh Nhân yân Lếo, pôa Nguyễn Xuân Phúc, kăn xiâm hnê ngăn tơnêi têa prếi kơdrâi pôa hiăng troh pôu kơ-êng, tơpui ƀă mâu ngế cheăng kăn teăng mâ Việt Nam a Lếo ƀă teăng mâ kuăn pơlê Việt Nam, khu mơdró kâ, mâu hok tro Việt Nam dế hriâm tâp a Lếo. Pôa Nguyễn Xuân Phúc, kăn xiâm hnê ngăn tơnêi têa tối nhên, rôh lăm pôu kố hiăng châ tơniăn ƀlêi chiâng tung tâi tâng, kố cho tơdroăng kơnôm ing veăng tŏng kum ƀă pêi cheăng châ tơƀrê dêi kăn teăng mâ, rơtế ƀă tơdroăng ki tŏng kum dêi kuăn pơlê Việt Nam dế rêh ối, cheăng kâ a Lếo.

Kăn xiâm hnê ngăn tơnêi têa tối nhên 100 rơpâu ngế Việt Nam a Lếo pơrá đi đo ngăn troh tơnêi têa, ƀă môi hiâm mơno tŏng kum kuăn pơlê a tung tơnêi têa drêng trâm pá xua pơreăng COVID-19 pro. Tung hiâm mơno mê, pôa Nguyễn Xuân Phúc rơhêng vâ kuăn pơlê Việt Nam akố pơtối mơdêk khôi hmâ, vâ rêm ngế kuăn mơngế Việt Nam rêh ối ƀă pêi cheăng a Lếo cho môi ngế ki djâ troăng ahdrối, tơxâng cho mơngế Việt Nam.

Katarina Nga tơplôu ƀă tơbleăng