VOV4.Sêdang - Drêng troh tơbâ 60 hơnăm Hâi mơjiâng Hngêi trung Sỹ quan Lục quân 2 lơ (27/8/1961 – 27/8/2021),  pôa Nguyễn Xuân Phúc, Kăn xiâm hnê ngăn tơnêi têa hiăng pơtroh kơthô rơkâu mâu kăn ƀô̆, sỹ quan, thái cô hnê, mâu ngế ki hriâm, mâu lêng dêi Hngêi trung. Teăng mâ Kăn xiâm Đảng, Tơnêi têa ƀă kăn Đảng lêng Xiâm, pôa Nguyễn Xuân Phúc, kăn xiâm hnê ngăn tơnêi têa pơtroh ăm mâu rơxông kăn lêng, kăn ƀô̆, sỹ quan, thái cô hnê, mâu ngế hriâm, mâu ngế ki pêi cheăng ƀă mâu lêng Hngêi trung Sỹ quan Lục quân 2 mâu tơdroăng lĕm ro hmâ ƀă rơkong rơkâu tơdroăng ki lĕm má môi.

Mơjiâng a pơla ai tơdroăng tơplâ Peăng hdroh tơnêi têa tung pơla plâ xâ Mih, tŏng kum tơnêi têa luâ 60 hơnăm mơjiâng, hnê mơjiâng, tơplâ ƀă xông tơ-ƀrê, mâu rơxông kăn ƀô̆, sỹ quan châ hriâm a hngêi trung hiăng veăng tơplâ lâp lu mâu tíu tơplâ, veăng ‘no hnoăng ki kal vâ châ ƀlêi trâng dêi mâu lêng ƀă kuăn pơlê pin tung pơla ai tơdroăng tơplâ pro tơleăng lĕm peăng Hdroh tơnêi têa hdrối nah ƀă tung mâu hơnăm mơjiâng, kring vế Tơnêi têa nôkố.

Troh nôkố, Hngêi trung hiăng chiâng môi hngêi trung hnê mâu sỹ quan pơkuâ Lục quân hriâm râ đăi hok, klêi đăi hok,  ƀă tí tăng ‘nâi plĕng khoa hok ngê̆ thuât lêng dêi Khu lêng pin.

Kăn xiâm hnê ngăn tơnêi têa loi khât tung la ngiâ, Hngêi trung kô pơtối mơ-eăm, ôh tá la lâi pơtê pơ’lêh nếo, mơdêk tơ-ƀrê tơdroăng hnê ƀă hriâm ƀă tí tăng ‘nâi plĕng khoa hok, pê klêi hnoăng cheăng pơcháu, veăng ‘no hnoăng mơjiâng Khu lêng kăch măng rơkê chôa mơnhông rế tơ-ƀrê.

Gương tơplôu ƀă tơbleăng