VOV4.Xơ Đăng - Klăng roh Việt Nam pêi kêi đeăng ƀlêi trâng hneăng cheăng Kăn cheăng ki ôh tá êa ai mâ đi đo Grup kring vế Khu lâp kong têa hneăng hơnăm 2020 – 2021, pôa Nguyễn Xuân Phúc, Kăn xiâm hnê ngăn tơnêi têa nếo ai pơkâ thế pêi ki kal, tung mê tối nhên, Việt Nam nếo loi tơngah, hbrâ pôu râng hên hnoăng cheăng ki kal lâp plâi tơnêi xua hơniâp lĕm ƀă mơnhông mơdêk krá tơniăn.

Mơnhông tơmeăm ki ai hlâu ƀă ivá nếo dêi tơnêi têa, ƀă tơdroăng ki mơ-eăm hên, Việt Nam hiăng veăng hbrâ xêh ƀă pêi pro kơtăng, pơkâ hên troăng pêi ki rơkê, veăng kum hên tung tơdroăng Grup kring vế Khu lâp kong têa, ƀă tơdroăng pơkâ thế pêi đi đo cho ‘’Khu tơrŭm xua hơniâp lĕm krá tơniăn’’ tung tơdroăng ti tăng troăng mơdât, tơleăng tơdroăng tơplâ tơplong, tơdjêp tơrŭm Grup kring vế Khu lâp kong têa ƀă ASEAN, hbrâ mơdât ƀă pơloăng mơnúa ƀă tơdroăng hơniâp lĕm ƀă gak kring lâp plâi tơnêi, ing tơdroăng tiô Luât Khu lâp kong têa ƀă luât lâp plâi tơnêi.

Tơdroăng ki mê, xuân mơhno um méa dêi môi Việt Nam ƀeăn ƀĕng rơkê, pơ’lêh nếo, ƀă tơdroăng pơkâ thế pêi ó rơdêi ƀă troăng tơmiât hơngế, pói tơngah mơnhông mơdêk tơnêi têa ó rơdêi troh hơnăm 2045 hiăng pơkâ mơ’no a Hneăng hôp Đảng roh má XIII. Tơdjuôm ivá ƀă pơlê pơla lâp plâi tơnêi nôkố, cho môi Việt Nam nếo loi tơngah, hbrâ rơnáu pôu râng hên hnoăng cheăng lâp plâi tơnêi xua hơniâp lĕm ƀă mơnhông mơdêk krá tơniăn.

A Sa Ly tơplôu ƀă tơbleăng