VOV4.Sêdang - Kơxo lơ 29/7, a Tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa tơdah pôa Lloyd Austin, Ngế xiâm pơkuâ lêng kong têa Mih dế ai roh lăm pôu pêi cheăng a tơnêi têa Việt Nam tiô rơkong krếo thế dêi Đăi tươ̆ng Phan Văn Giang, Ngế xiâm pơkuâ mô đô̆i. Teăng mâ Tơnêi têa ƀă kuăn pơlê Việt Nam, pôa Nguyễn Xuân Phúc mơnê Mih hiăng tŏng kum Việt Nam hên vaccine hbrâ mơdât COVID 19; kheăn kơdeăn mâu tơdroăng châ tơƀrê tơpui tơno pơla Ngế xiâm pơkuâ lêng kong têa Mih ƀă pôa Phan Văn Giang; péa pâ hiăng môi tuăn châ hên tơdroăng xiâm tơrŭm cheăng ki kal tung la ngiâ.

Pôa Lloyd Austin xuân mơnhên tối, Mih kô thăm mơnhông tâ mê nếo ƀă Việt Nam rơnêu tơmeăm khoăng xua tơplâ xâ nah; ing mê, đi đo mơjiâng ƀă thăm pro hiam mơno loi tơngah pơla péa tơnêi têa.

Tơdah Ngế xiâm pơkuâ lêng kong têa Mih, Ngế pro xiâm hnê ngăn Chin phuh phiu ro roh lăm pôu pêi cheăng dêi Ngế xiâm pơkuâ lêng kong têa Mih, pói vâ thăm tơrŭm cheăng tŭm têk ƀă Mih péa pâ châ pơxúa, xua hơniâp lĕm, tơniăn ƀă mơnhông mơdêk tung kơpong ƀă lâp plâi tơnêi. Ngế pro xiâm hnê ngăn tơnêi têa tối nhên, tơrŭm cheăng pơla péa tơnêi têa ối hên tơdroăng vâ mơnhông mơdêk, pâ thế péa pâ tơrŭm cheăng krá tơniăn tâ tung la ngiâ, ki rơhêng vâ tối thăm mơnhông mâu kơvâ cheăng ki Mih ai ivá ƀă Việt Nam ai tơmeăm vâ mơnhông môi tiah hngêi trăng, troăng klông, mơngế pêi cheăng, on tơhrik ki vêh pro ƀă hía hé.

A Sa Ly tơplôu ƀă tơbleăng