VOV4.Sêdang - Hlo tơdroăng rêh kâ ối, pêi cheăng ôh tá tơniăn, xua pơreăng COVID-19 tâ tú hên ó a Pơlê kong kân Hồ Chí Minh, Khu xiâm pơkuâ ngăn lêng hiăng pơtroh mâu lêng, rơxế, kế tơmeăm veăng tŏng kum ăm hnoăng cheăng hbrâ, tơplâ, mơdât pơreăng.

Nôkố, ai 9 tung 9 kong pơlê kơpong kuân khu 7 pơrá ai pơreăng xông tâ tú, tung mê râ ó má môi cho a Pơlê kong kân Hồ Chí Minh ƀă rơpâu ngế tro tâ pơreăng rêm hâi, pơtối mê cho Bình Dương, Long An, Đồng Nai ƀă hía hé. Tiô hnê mơhno dêi Khu xiâm pơkuâ Mô đô̆i, Kơ koan xiâm pơkuâ ngăn pơkeăng ƀă khăm pơlât kơvâ mô đô̆i ƀă Kuân khu 7 hiăng rĕng pơ’lêh tơdroăng pêi cheăng dêi hngêi pơkeăng lêng – kuăn pơlê peăng mâ hâi lo chiâng hngêi pơkeăng pơlât COVID 19 ăm mô đô̆i ƀă kuăn pơlê kơpong Pơlê kong kân Hồ Chí Minh ƀă ai 400 to xoăng koi pơlât ƀă pêi pro klêi hngêi pơkeăng pơlât pơtân mâu ngế tro tâ pơreăng kơxô̆ 5A.

Tŭm péa hngêi pơkeăng kố dế pơlât ăm 518 ngế yương tĭnh, kơxô̆ kố ối pơtối tâk tiô tơdroăng pơreăng xông tâ tú a pơlê kong kân. Thiê̆u tươ̆ng, Phŏ yăo sư, Tiê̆n sih Nguyễn Hồng Sơn, Kăn pơkuâ hngêi pơkeăng kân 175 tối ăm ‘nâi, hngêi pơkeăng dế pơkâ mơdêk ivá khăm ngăn châ hlo mơngế tro tâ COVID 19 ƀă châ rah xo cho môi tíu pâk vaccine tâi tâng kuăn pơlê vâ kơdê tah pơreăng, nôkố hngêi pơkeăng dế thăm pêi pro ăm tơdroăng kố:

‘’Drêng dế ai hên má môi ‘na pơreăng xông tâ tú pơla kố nah, Hngêi pơkeăng 175 châ hlo 120 ngế yương tĭnh tung pơlê pơla klêi kơ’nâi rah khăm. Môi ngế mô đô̆i dêi hngêi pơkeăng kân 175 hiăng tro tâ drêng pêi hnoăng cheăng tung kơbong khăm pơlât. Ngin hiăng pâ Kơ koan xiâm pơkuâ ngăn pơkeăng ƀă khăm pơlât vâ rak tơniăn tơtro ăm tâi tâng rêm tơdroăng khăm pơlât ƀă rak tơniăn ăm tơdroăng pêi cheăng dêi hngêi pơkeăng, ôh tá tơdjâk troh tơdroăng hbrâ mơdât pơreăng dêi hngêi pơkeăng. Hngêi pơkeăng xuân hiăng pâ rĕng xing xoăng ăm kơmăi khăm ngăn xêh ƀă kâi khăm ngăn xêh 1 rơpâu ngế môi hâi, vâ châ tơniăn tiô pơkâ thế nôkố’’.

Mâu thái pơkeăng, ƀok thái pơkeăng Kuân khu 7 lăm tŏng kum Pơlê kong kân Hồ Chí Minh hbrâ mơdât pơreăng

Veăng kum mơdât pơreăng, khu ƀok thái pơkeăng dêi mô đô̆i ƀă kuân khu 7 hiăng thăm pơtroh hên rơxế khăm ngăn troh lâp lu ƀă kơmăi khăm ngăn ki hên kuăn pơlê. Kuân khu 7 hiăng pêi pro 55 tíu klâ kơtăn ăm mâu ngế F1 ƀă lối 12 rơpâu 500 xoăng koi pơlât. Tơdrêng amê hiăng mơjiâng 8 tôh, khu ki ai mâ lâp lu tung hbrâ mơdât pơreăng châ mơjiâng mâu tôh chuyên khoa, 51 tôh ti tăng mâu ngế tro tâ pơreăng, lối 200 tôh hiăng khăm ngăn lối 37 rơpâu 800 ngế, pâk lối 10 rơpâu 900 trum pơkeăng vaccine ăm kuăn pơlê veăng mơdât pơreăng a Pơlê kong kân Hồ Chí Minh.

Rơtế ƀă Hngêi pơkeăng khu mô đô̆i – kuăn pơlê peăng mâ hâi lo ƀă hngêi pơkeăng pơlât mâu ngế tro tâ pơreăng kơxô̆ 5A pơlât ăm mâu ngế tro tâ COVID a Pơlê kong kân Hồ Chí Minh ƀă mâu kong pơlê ki achê, Kuân khu 7 dế pơtối pêi pro hngêi pơkeăng pơlât mâu ngế tro tâ pơreăng kơxô̆ 5B tiô hnê mơhno dêi Khu xiâm pơkuâ mô đô̆i vâ kâi mơdât pơreăng tung pơlê kong kân. Thiê̆u tươ̆ng Võ Văn Tri, Kăn phŏ pơkuâ Mô đô̆i Kuân khu 7 tối ăm ‘nâi:

‘’Ngin hbrâ pêi pro hngêi pơkeăng pơlât mâu ngế tro tâ pơreăng 5B, mâu tơdroăng hbrâ rơnáu ngin hiăng hbrâ mơjiâng klêi. Drêng ai luât pêi pro hngêi pơkeăng pơlât mâu ngế tro tâ pơreăng 5B ƀă pơkâ pơtroh mơngế pêi cheăng tôh ai 150 ngế, ối tung kuân đoân 4 ƀă Ƀinh đoân 16 mê ngin tung pơla dâng 5 chôu  ngin hiăng mơjiâng tơdrêng hlối hngêi pơkeăng 5B, ƀă tung pơla 24 chôu ƀă 24 chôu mê ngin kô hbrâ ăm hngêi pơkeăng chiâng pêi cheăng. Hngêi pơkeăng kố tâi tâng ƀiên chê̆ 150 ngế, xua mâu hngêi pơkeăng dêi kuân khu ƀă dêi kuân đoân 4, ƀinh đoân 16 kô pôu râng hnoăng cheăng’’.

Khu mô đô̆i xuân hiăng hnê mơhno mâu khu pêi cheăng veăng tơrŭm tơdah xo, hnê mơhno 4.511 ngế kăn ƀô̆, mâu ƀok thái pơkeăng thăm tŏng kum mâu cheăm bêng tung kuân khu 7. Tung mê khŏm mơ-eăm kum ăm Pơlê kong kân Hồ Chí Minh ai 4.025 kăn ƀô̆, mơngế cheăng hbrâ mơdât pơreăng. Thươ̆ng tă Vũ Hải Sản, Ngế xiâm phŏ pơkuâ lêng tối ăm ‘nâi, pơreăng xông tâ tú râ ó a Pơlê kong kân Hồ Chí Minh, Khu xiâm pơkuâ mô đô̆i hiăng pơtroh khu pêi cheăng, rơxế a mâu kuân khu ƀă mâu đông lêng tung kuân khu 7, tơkŭm mơngế ăm hbrâ mơdât pơreăng ƀă hbrâ rơnáu mơdât pơreăng, mơnhên kố cho hnoăng cheăng ki kal môi tiah kô thâ vâ mot tơplâ ƀă tơdroăng xâu xía, pơloăng mơnúa ‘na kring vế ôh tá xê tiô khôi túa roh hdrối nah:

‘’Thăm ăm thế mâu lêng mot pêi cheăng ăm Kuân khu 7, khu pêi cheăng xôh pơkeăng kơdê pơreăng ai lối 20 toăng rơxế. Khu xiâm pơkuâ mô đô̆i pơcháu hnoăng cheăng tá Kuân đoân 4, Mô đô̆i pơkuâ ‘na trếo pơkeăng ƀă Kuân khu 7 xua vâ tơveăng kuăn pơlê plâ hâi plâ măng tiô pơkâ dêi kơpong tá Pơlê kong kân Hồ Chí Minh, Đồng Nai, Bình Dương ƀă mâu kong pơlê ki ê. Krê Khu ƀok thái pơkeăng kơvâ mô đô̆i hiăng thăm pơtroh mơngế pêi cheăng ăm Kuân khu 7 cho 270 ngế mô đô̆i ƀă mâu kơmăi kơmok kih thuât kum ăm kuân khu 7 ƀă ki rơhêng vâ tối cho Pơlê kong kân Hồ Chí Minh’’.

Ôh tá xê to tŏng kum ăm Pơlê kong kân Hồ Chí Minh ƀă mâu kong pơlê ai pơreăng ki achê mê ƀă khu mơngế hbrâ mơdât pơreăng, khu mô đô̆i ối thăm tŏng kum tơmeăm khoăng, kum kuăn pơlê kơpong klâ kơtăn kơdroh pá puât. Mâu hâi hdrối, mâu đông dêi khu mô đô̆i hiăng tŏng kum kuăn pơlê a Pơlê kong kân Hồ Chí Minh lối 70 tâ̆n kơchâi drêh, plâi pôm, lối 41 rơpâu kơtâ í, 50 tâ̆n phái, rơpâu kơthung xup kơxŏng khăng ƀă hên tơmeăm kâ ki ê.

Ing mâu tơdroăng ‘’tơdjâk tuăn pâ troh lâp lu’’, ‘’hngêi tuăn pâ khu mô đô̆i - kuăn pơlê’’, ‘’kơchơ kân - siêu thĭ krúa lĕm’’, ‘’phái xơrô liăn’’, ‘’tíu tê tơmeăm khoăng xơrô liăn’’ ƀă hía hé, mâu tơmeăm ing kơpeăng kŏng mô đô̆i hiăng troh ƀă kuăn pơlê, pro hơtô hiâm mơno kuăn pơlê kơpong ki kâng kơxái ôh tá ăm mot lo, tơveăng kum tơdjuôm ivá ki ó rơdêi vâ kâi tơkâ hluâ pá puât, xâu xía, khŏm troh tah pơreăng.

VOV1 rah chêh

A Sa Ly tơplôu ƀă tơbleăng