VOV4.Sêdang - Kơxê lơ 5/8, Khu râ kăn séa ngăn kơxô̆ 143 dêi Khu xiâm pơkuâ hnê ngăn Đảng xua pôa Nguyễn Trọng Nghĩa, Kăn pơkuâ hnê ngăn cheăng Đảng, Kăn pơkuâ ngăn ‘na tơdroăng loi tĭng tiô khôp Tơnêi têa pơkuâ xiâm khu râ kăn hiăng ai roh pêi cheăng ƀă Khu pơkuâ cheăng Đảng ủy Kŏng an Tơnêi têa. Tơdroăng ki xiâm tung mơjiâng Đảng, mê cho Pơkâ Tơnêi têa 4 (hneăng má XII) ƀă Pơkâ kơxô̆ 08 ‘na hnoăng ki djâ troăng ahdrối.

Pôa Nguyễn Trọng Nghĩa xông tơpui a roh pêi cheăng

Xua mê, kal mơdêk pôu râng hnoăng cheăng, tơdroăng pêi kơtăng khât, hvái ngăn tơdroăng cheăng, vâ rêm đảng ƀô̆ mê khu râ kăn troh pêi cheăng pơrá pôu râng hnoăng cheăng, pơ’lêh ing séa ngăn dêi râ kơpêng chiâng séa ngăn xêh, troh séa ngăn xêh dêi rêm đảng ƀô̆, khu râ kăn pơkuâ hnê ngăn cheăng Đảng, ki má lối cho ngế ki ối a ko ƀă khu pơkuâ cheăng Đảng. Pôa Nguyễn Trọng Nghĩa loi tơngah, ƀă tơdroăng khŏm mơ-eăm, pôu râng hnoăng cheăng, Đảng ủy Kŏng an Tơnêi têa ƀă Khu râ kăn séa ngăn kô pêi pro tơdroăng cheăng tơniăn dâi lĕm, rĕng, tro tiô pơkâ dêi Đảng.

A Sa Ly tơplôu ƀă tơbleăng