VOV4.Sêdang - Khu xiâm pơkuâ hnê hriâm ƀă Hnê mơjiâng tuăn ngôa rơkê ai mơ-éa pơtroh Kăn hnê ngăn Vi ƀan kuăn pơlê mâu kong pơlê, pơlê kong kơdrâm ối tung Tơnêi têa ‘na tơdah, pro tơ’lêi hlâu ăm hok tro hriâm tâp a tíu ối xua pơreăng COVID 19. Tiô Khu xiâm pơkuâ hnê hriâm ƀă Hnê mơjiâng tuăn ngôa rơkê, drêng ai pơreăng COVID 19 xông tâ tú ó, hên hok tro thế vêh a pơlê tơná rêh ối mê ôh tá teăm vêh a hngêi trung hriâm vâ pơxiâm hơnăm hriâm nếo.

Vâ tơniăn hnoăng ki pơxúa hriâm tâp ăm hok tro, Khu xiâm pơkuâ hnê hriâm ƀă Hnê mơjiâng tuăn ngôa rơkê pơkâ thế Kăn hnê ngăn Vi ƀan kuăn pơlê mâu kong pơlê, pơlê kong kơdrâm ối tung Tơnêi têa hnê mơhno Khu pơkuâ hnê hriâm ƀă hnê mơjiâng tuăn ngôa rơkê, mâu hngêi trung pơtối tơdah, pro tơ’lêi hlâu ăm hok tro hriâm tâp a tíu rêh ối tung pơla hbrâ mơdât pơreăng COVID 19, tơtro ƀă tơdroăng nôkố dêi pơlê, hngêi trung; Tơrŭm ƀă mâu kăn pơkuâ pơlê, hngêi trung tíu hok tro ai pói vâ troh hriâm vâ tơdah, ăm hok tro hriâm tâp tro tiô mơngế.

A Sa Ly tơplôu ƀă tơbleăng