VOV4.Sêdang - Hlá mơ-éa pơkâ thâ ‘na tơdroăng pro tơ’lêi hlâu ăm tơdroăng châ kum kơxô̆ liăn rôe báu, phái, tơmeăm khoăng xua pôa Nguyễn Hồng Diên, Ngế xiâm pơkuâ Kơmăi kơmok – tê mơdró kĭ hâi lơ 12/08/2021 tối nhên: Vâ tŏng kum ăm mâu ngế tê mơdró, khu tê mơdró, ngế pêt mơjiâng, tê mơdró báu, phái tung pơla pơreăng COVID 19, Hngêi arak liăn tơnêi têa Việt Nam hiăng ai mơ-éa pơkâ thế mâu Hngêi arak liăn tê mơdró ƀă Hngêi arak liăn Tơnêi têa tíu pêi cheăng mâu kong pơlê, pơlê kong kơdrâm kơpong tơbăng kroăng Cửu Long châ tơniăn kơxô̆ liăn ăm mung vâ rôe, ‘măn báu, phái a kơpong tơbăng kroăng Cửu Long ƀă hên troăng hơlâ.

Laga, klêi kơ’nâi séa ngăn tơdroăng kơchơ tê mơdró ƀă tơdroăng tơpui tơno ƀă Khu pơkuâ kế kâ Việt Nam ƀă mâu ngế tê mơdró tê phái ngi kong têa ê, tơdroăng châ mung kơxô̆ liăn tiô hlá mơ-éa kơxô̆ 5747 tá hâi châ tơ’lêi. Vâ pro tơ’lêi hlâu tâ mê nếo ăm mâu khu tê mơdró tung tơdroăng châ mung kơxô̆ liăn rôe báu, phái ăm kuăn pơlê, Khu xiâm pơkuâ Kơmăi kơmok – tê mơdró pâ thế Ngế pro xiâm hnê ngăn Chin phuh pơcháu Hngêi arak liăn Tơnêi têa Việt Nam séa ngăn, hnê mơhno mâu Hngêi arak liăn tê mơdró ai tŏng kum ‘na liăn rơkâ ăm mâu khu tê mơdró; ƀă pro tơ’lêi hlâu ăm mâu khu tê mơdró châ kok tơmeăm mung liăn ƀă mâu tơmeăm kô rôe.

A Sa Ly tơplôu [ă tơbleăng