VOV4.Sêdang - Nôkố tung lâp tơnêi têa ối lối 26 rơpâu ngế hok tro a 42 to kong pơlê, pơlê kong kân tá hâi châ tơ’noăng râ má pái phôh thong. Kố cho mâu ngế ki F0, F1, F2 lơ dế ối tung kơpong mơdât mot lo a kong pơlê tro klâ krê, xua tơdjâk dêi pơreăng COVID-19. Khu xiâm ngăn hnê hriâm ƀă hnê mơjiâng tuăn ngoâ rơkê ai hlá mơ-éa pơtroh ăm Vi ƀan hnê ngăn mâu kong pơlê, pơlê kong kân ối tung Tơnêi têa ‘na tơdroăng ki tơkŭm po rôh tơ’noăng râ má pái rôh má 2. Tiah mê, rôh má 2 dêi rôh tơ’noăng râ má pái phôh thong hơnăm 2021 kô châ tơkŭm po a mâu hâi lơ 6 ƀă lơ 7/8 ăm mâu hok tro ki tá hâi châ tơ’noăng, lơ ôh tá pro klêi ƀai tơ’noăng a rôh tơ’noăng má 1 hdrối kố nah.

-Ô pôa Nguyễn Hữu Độ! Drêng hlo tơdroăng pơreăng tâ tú rế  rơ-iô, mê pôa ăm ‘nâi ‘na tơdroăng dêi Khu xiâm ngăn hnê hriâm ƀă hnê mơjiâng tuăn ngôa rơkê kô ai troăng hơlâ pơkâ ki tiah lâi vâ tơniăn hnoăng ki ai xúa ăm mâu hok tro ki hâi châ tơ’noăng mơgêi hriâm râ má pái Phôh thong rôh má 1?

Pôa Nguyễn Hữu Độ: Tơkéa vâ tối tung pơla ai pơreăng tâ tú rế rơ-iô ƀă tâ tú rế troh lâp lu môi tiah dế kố, kơxô̆ mơngế ki tro tâ tú troh rơpâu ngế tung môi hâi, Khu xiâm ngăn ‘na hnê hriâm ƀă hnê mơjiâng tuăn ngôa rơkê hlo tiah kố, tơdroăng tơkŭm po tơ’noăng rôh má 2 cho môi tơdroăng ki pá khât. Mơhé ti mê, rôh má 1 hiăng châ tơkŭm po ƀă lối 96% ngế hok tro veăng tơ’noăng, kơxô̆ ki u ối tơ’noăng rôh má 2 tiô tối tơbleăng dêi mâu kong pơlê ai dâng lối 26 rơpâu  254 ngế hok tro a 42 to kong pơlê, pơlê kong kân.

Ƀă tơdroăng ki tiah mê, kơxô̆ hok tro ki mê kô veăng tơ’noăng rôh má 2. Khu xiâm ngăn ‘na hnê hriâm ƀă hnê mơjiâng tuăn ngôa rơkê tơkŭm po tơ’noăng rôh má 2 ƀă tơdroăng thế rak tơniăn ăm tâi tâng mâu hok tro ki ôh tá châ veăng tơ’noăng rôh má 1 xua ai tơdroăng kal ki ê (to mâu hok tro ki lơ ôh tá tơdrăng tung rôh tơ'noăng hdrối kô nah ôh tá châ vâ tơ’noăng rôh má 2).

Pôa Nguyễn Hữu Độ, Ngế xiâm phŏ ngăn hnê hriâm ƀă hnê mơjiâng tuăn ngôa rơkê

-Tiah mê pơkâ tơ’noăng mơgêi hriâm râ má pái phôh thong rôh má 2 kô tơkŭm po môi tiah lâi, ô pôa?

Pôa Nguyễn Hữu Độ:  ‘Na tơdroăng pơkâ tơ’noăng rôh má 2 mê Khu xiâm ngăn hnê hriâm ƀă hnê mơjiâng tuăn ngôa rơkê hiăng hbrâ rơnáu hôp ƀă 42 to kong pơlê, pơlê kong kong kơdrâm, pơlê kong kân ƀă hiăng vâ môi tuăn ƀă Vi ƀan mâu kong pơlê, pơlê kong kân ăm vâi tơ’noăng a hâi lơ 5, 6, 7 khế 8 ah, ƀă ing mê, mâu khu xiâm ngăn ‘na hnê hriâm kong pơlê hiăng ai hlá mơ-eá tối tơbleăng ăm Vi ƀan mâu kong pơlê, ƀă nôkố Khu xiâm ngăn hnê hriâm ƀă hnê mơjiâng tuăn ngôa rơkê hiăng xo mâu hlá mơ-eá pơtroh dêi Kăn xiâm hnê ngăn Vi ƀan mâu kong pơlê, pơlê kong kân ki ai pơreăng pâ thế tơ’noăng a hâi lơ 5,6,7.

Xua mê râ, Khu xiâm ngăn hnê hriâm ƀă hnê mơjiâng tuăn ngôa rơkê hiăng ai hlá mơ-eá chêh pơtroh môi tuăn tơdroăng tơkŭm po tơ’noăng mơgêi hriâm râ má pái phôh thong rôh má 2 a hâi lơ 5,6,7 khế 8 hơnăm 2021 ƀă ing mê xuân dế pâ thế mâu kong pơlê pêi mâu tơdroăng cheăng ki tơdjâk troh ‘na kih thuât.

Mê thế ai hlá mơ-eá chêh inâi tơrêm ngế ƀă ai tơdroăng ki pơ’lêh  ‘na hô̆i đong ngăn tơ’noăng. Pơtih ai hên kong pơlê bú ai 1,  2 ngế tê tơ’noăng rôh má 2, ai kong pơlê châ 100 ngế tơ’noăng  mê kô chiâng pơtroh inâi ăm mâu kong pơlê ki ê vâ kơdroh kơxô̆ hô̆i đong ngăn tơ’noăng ăm gá tơtro. Mâu vâi o hok tro ki ai tơdroăng púi vâ tiah mê, ing tơdroăng môi tuăn pơla Hô̆i đong ngăn tơ’noăng mê Khu  xiâm ngăn hnê hriâm ƀă hnê mơjiâng tuăn ngôa rơngê kô môi tuăn ƀă kô ăm phần mềm vâ mơjiâng chêh kơxô̆ inâi, veăng tơ’noăng vâ vâi o kô châ veăng tơ’noăng tro tiô puí vâ.

Nôkố, Khu xiâm hiăng  pơtroh hlá mơ-eá thế mâu kong pơlê tối tơbleăng troăng rơhlâ tơ’noăng dêi kong pơlê vâ tơniăn ‘na pơreăng tâ tú ƀă xuân vâ rak tơniăn ăm tơdroăng tơkŭm po tơ’noăng.

-Ƀă mâu kong pơlê ki ai pơreăng tâ tú rơ-iô, kơxô̆ mâu ngế ki tâ tú tâk châ hrĭng ngế, thăm nếo châ rơpâu ngế rêm hâi, mê Khu xiâm ngăn hnê hriâm ai pơkâ troăng hơlâ môi tiah lâi?

Pôa Nguyễn Hữu Độ:  Ƀă mâu kong pơlê ki ai pơreăng tâ tú rơ-iô mê Khu xiâm ngăn hnê hriâm ai tối thế ngăn ivá ngế hok tro mê ki má môi, xua mê, bú chiâng tơkŭm po la lâi hlo châ tơniăn khât. Khu xiâm ngăn pơkeăng pơlât hiăng ai tơdroăng hnê mơhno tơkŭm po tung pơla ki lâi hlo tơniăn, tá hok tro F1, F2 vâ tơniăn ăm tâi tâng. Mơhé ti mê, vâ tơniăn tung tơdroăng pơla ai pơreăng tâ tú tối tơchoâm ga tiah mê, tâ tú tung kuăn pơlê gá tiah mê, ôh tá ‘nâi ngế ki F0 mê cho tơdroăng ki pá khât ‘nâng.

Xua mê, ƀă mâu tíu ki lâi ôh tá chiâng tơkŭm po tơ’noăng xua tơdroăng ki pá khât mê chiâng tối tơbleăng ăm Khu xiâm ngăn hnê hriâm vâ ai troăng rơhlâ veăng kum ăm mâu vâi o. Kô chiâng tiô tơdroăng pơkâ séa ngăn ăm mâu hok tro. Xua tơdroăng pá puât môi tiah nôkố mê ai mâu kong pơlê tối thế ăm phêp tơkŭm po tơ’noăng rôh má 3.

La vâ tối khât tơkŭm po tơ’noăng rôh má 3 tung pơla ai pơreăng tâ tú rơ-iô tiah dế nôkố tơdroăng tơkŭm po tơ’noăng cho pá puât khât ‘nâng. Xua mê, Khu xiâm ngăn hnê hriâm xuân tối  hbrâ rơnáu kô séa ngăn ƀă mâu ngế ki tiah mê kô chiâng vâ séa ngăn ăm mâu vâi o ƀă kô ai troăng rơhlâ pơkâ ki tơtro vâ kum ăm mâu vâi o châ rah xo mot hriâm đại học ki tơtrro ƀă tơdroăng púi vâ nôkố.

-Mơnê kơ pôa!

Gương tơplôu ƀă tơbleăng