VOV4.Sêdang - Kơxo lơ 25/8, Đảng ƀô̆, khu pơkuâ ƀă kuăn pơlê cheăm Čư̆ Hreng, pơlê kong kơdrâm Kon Tum tơdah xo pơkâ dêi Vi ƀan hnê ngăn kong pơlê Kon Tum mơnhên cheăm pêi klêi thôn pơlê nếo. Klêi kơ’nâi 10 hơnăm kơhnâ pêi pro tơdroăng pơkâ mơjiâng thôn pơlê nếo, cheăm Čư̆ Hreng, pơlê kong kơdrâm Kon Tum pêi klêi tŭm 19/19 tơdroăng pơkâ ƀă hên tơdroăng ki pêi pro ki xiâm, môi tiah: tâi tâng kơxô̆ kuăn pơlê ai cheăng đi đo tung hơnăm pêi cheăng châ hên lối 99%; kơxô̆ rơpŏng kơtiê bu ối 2,52%; pêi lo liăn rêm ngế rêm hơnăm lối 41 rơtuh 400 rơpâu liăn.

Teăng mâ cheăm Čư̆ Hreng xo pơkâ pêi klêi thôn pơlê nếo dêi Vi ƀan hnê ngăn kong pơlê Kon Tum

Ƀă tơdroăng ki cheăm Čư̆ Hreng châ mơnhên pêi klêi thôn pơlê nếo, troh nôkố pơlê kong kơdrâm Kon Tum ai 7 to cheăm thôn pơlê nếo ƀă kố cho cheăm thôn pơlê nếo má 29 dêi kong pơlê Kon Tum.

Katarina Nga tơplôu ƀă tơbleăng