VOV4.Sêdang - Tơdjuôm ivá hbrâ mơdât pơreăng COVID 19, mơnhông tơdroăng djâ troăng ahdrối, tuăn tơmiât pêi rơkê dêi rơxông nếo, Khu pơkuâ Đoân droh rơtăm Kon Tum hiăng mơjiâng 12 khu ki pleăng hnoăng cheăng tŏng kum mâu tơdroăng hbrâ mơdât pơreăng, kâi trâng ƀă pơreăng COVID 19. Klêi kơ’nâi châ mơjiâng, mâu Khu ki pleăng hnoăng cheăng hiăng tŏng kum tơdroăng pâk vaccine hbrâ mơdât COVID 19 a mâu tíu pâk tung kong pơlê; tŏng kum pơto tơmeăm khoăng, tơdah tơmeăm khoăng, tơmeăm ki xing xoăng troh mâu kơpong klâ kơtăn, tíu gak mơdât pơreăng; kum a mâu tíu pế pơchên hmê kơchâi kâ ăm kơpong klâ kơtăn.

Khu ki pleăng hnoăng cheăng veăng pế pơchên hmế kơchâi kâ tung kơpong klâ kơtăn

Rơtế ƀă mơjiâng 12 Khu ki pleăng hnoăng cheăng tŏng kum mâu tơdroăng hbrâ mơdât pơreăng COVID 19, Khu pơkuâ Đoân droh rơtăm kong pơlê Kon Tum xuân kơhnâ veăng mơhnhôk khu mơngế veăng pêi cheăng, tŏng kum tơmeăm khoăng hbrâ mơdât pơreăng ăm mâu khu ki mơdât pơreăng.

A Sa Ly tơplôu ƀă tơbleăng