VOV4.Sêdang - Khu ngăn hnê hriâm ƀă hnê mơjiâng tuăn ngoâ rơkê kong pơlê Kon Tum hiăng pơkâ hâi ki vâ pơxiâm mot hơnăm hriâm nếo 2021 – 2022 ƀă mâu hok tro rêm râ a hâi lơ 5/9 ƀă hâi kơ’nâi mê cho hâi lơ 6/9 pơxiâm hâi hriâm ki apoăng. Vâ rak tơniăn tung pơla ai pơreăng COVID-19 tâ tú rơ-iêo ƀă mâu vâi o hok tro kơpong hngế hngo, kơpong hdroâng kuăn ngo ai tŭm kế tơmeăm xúa tung hriâm tâp ăm hơnăm hriâm nếo, Khu kăn pơkuâ mâu hngêi trung hriâm a Kon Tum dế pêi pro klêi mâu tơdroăng ki hbrâ, rơnáu.

Thái cô Hngêi trung râ má péa Văn Lem, cheăm Văn Lem, tơring Đăk Tô pêt loăng ngiât a bo hngêi trung

Troh nôkố tâi tâng mâu hngêi trung hriâm a mâu tơring kơpong hngế hngo, kơpong hdroâng kuăn ngo môi tiah Đak Glei, Tu Mrông, Kon Plông ƀă hên tơring ki ê dêi kong pơlê Kon Tum hiăng pêi pro klêi tơdroăng mơgruá, kơpuih văng hngêi trung lâm hriâm. Kăn pơkuâ Hngêi trung râ má môi Nguyễn Văn Cừ, a cheăm ki malối xơpá Đak Pxi, tơring Đăk Hà ăm ‘nâi, hơnăm hriâm nếo kố ai 278 ngế hok tro ƀă lối 90% cho kuăn muăn hdroâng kuăn ngo Rơteăng. Troh nôkố hnoăng cheăng hbrâ rơnáu ăm hâi ki pơxiâm mot hơnăm hriâm nếo dêi hngêi trung hiăng klêi tâi tâng.

Katarina Nga tơplôu ƀă tơbleăng