VOV4.Sêdang - Kơxê lơ 29/7, Khu hnê mơhno cheăng hbrâ mơdât pơreăng COVID-19 kong pơlê Kon Tum ai tơbeăng păng ‘nâng ‘na tơdroăng ki mơjiâng 2 tíu ki hbru têa kơxăng tê kơtê ăm kuăn pơlê ki to rơxế hon đa vêh pơlê sap ing kơpong ki ai pơreăng mâu kong pơlê peăng hdroh. Tiah mê, 2 tíu ki tot pơtê ƀă tŏng kum têa kơxăng tê kơtê a kong pơlê Kon Tum châ xoăng pro a 2 to troăng kân.

Kum têa kơxăng tê kơtê ăm kuăn pơlê a Tíu ki tê têa châu têa kơxăng 124.

Ƀă troăng kân 14, troăng kân Hồ Chí Minh a Tíu trêng têa kơxăng 124, troăng KM 1475, ối tung thôn Dục Nội, cheăm Đăk Nông, tơring Ngọc Hồi. ƀă troăng kân 24 cho a tíu ki trêng têa kơxăng 118, troăng Km 117 + 237, ối tung pơlê kân Măng Deang, tơring Kon Plông. Tâi tâi kuăn pơlê ki to rơxế hon đa vêh sap ing kơpong ki ai pơreăng cho mâu kong pơlê peăng Hdroh, drêng troh a 2 tíu ki tot pơtê kố, châ kum têa kơxăng tê kơtê cho 2 lit ƀă châ xúa mâu tơdroăng ki ai pơxúa tung tíu ki tê mơdró.

Ngế ki trêng têa kơxăng rak tơniăn hbrâ mơdât pơreăng kum kuăn pơlê

Tiô châ ‘nâi, tíu trêng têa châu têa kơxăng Kon Tum hiăng pêi pro tơdroăng tŏng kum têa kơxăng ăm kuăn pơlê vêh sap ing kơpong ki ai pơreăng a 2 tíu ki tê kế tơmeăm kố sap ing hâi lơ 25/7. Krê hâi lơ 29/7, 2 tíu ki tê kế tơmeăm kố hiăng tơdah 850 ngế kuăn pơlê ƀă kum têa kơxăng tê kơtê ăm 390 toăng rơxế hon đa.

Katarina Nga tơplôu ƀă tơbleăng