VOV4.Sêdang - Hâi lơ 26/7, Khu pơkuâ ngăn lêng ƀă Kŏng an Pơlê kong kân Hồ Chí Minh tơrŭm pêi pro hnoăng cheăng lăm pơtrui, séa ngăn tơdroăng pêi pro mâu tơdroăng pơkâ ‘na hbrâ mơdât pơreăng tung pơlê kong kân. Tiah mê, mâu khu lêng châ pơtroh sap ing 16 chôu hâi lơ 26/7/2021 ƀă pêi cheăng plâ hâi plâ măng, a 12 tíu séa ngăn, bo cheăng ƀă 90 tíu gak ngăn a mâu pơlê kong kân ki rơdâ. 450 ngế kăn ƀô̆ lêng ối tung Trung đoân Gia Định ƀă Tiêuh đoân Seá tăng ngăn lêng 31, Khu pơkuâ ngăn lêng Pơlê kong kân Hồ Chí Minh tơrŭm rơtế ƀă lối hrĭng ngế kan sat gâk troăng prôk, kăn sat séa ngăn tơdroăng xôi, 113 ƀă cơ đŏng ối tung Kŏng an Pơlê kong kân Hồ Chí Minh vâ mơdêk hbrâ mơdât ƀă mơdêk tơdroăng ki pơtrui ngăn a mâu troăng prôk.

Rôh ki tơrŭm cheăng kố, kăn ƀô̆, lêng tŏng kum khu lêng Kŏng an tung tơdroăng ki pơkâ thế gâk troăng ‘na rak ngăn kuăn pơlê, rơxế dế prôk a troăng, séa ngăn mâu tơdroăng vâ mơnhên tro mơngế, ngiâ méa kuăn mơngế, rơxế châ ăm phêp kơtâu tung pơla pêi pro tơdroăng pơkâ 16; tâng châ hlo mâu ngế pro xôi mê athế tơpui tơno ƀă khu Kŏng an chêh inâi pơxâu phâk tiô luât pơkâ.

Katarina Nga tơplôu ƀă tơbleăng