VOV4.Xơ Đăng -   Hâi lơ 5/1, Kŏng an kong pơlê Gia Lai tơkŭm po hneăng hôp mơgêi tơdroăng cheăng hơnăm 2021, tơbleăng tơdroăng cheăng pêi hơnăm 2022. Khĕn kơdeăn tơdroăng cheăng hơnăm 2021, Kŏng an kong pơlê Gia Lai hiăng tơbleăng tro mâu tơdroăng cheăng, kơxô̆ séa ngăn, tí tăng ngăn châ lối 85,3% tơdroăng xôi ki kân, malối ki xôi kân ai lối 90,65%. Tung hơnăm, kŏng an hiăng châ rup, mơhnhôk thế vâi lo lăm tối dêi tơdroăng xôi ai 116 ngế mâu ki phak hlối kơdê hlâ, tung mê ai 41 ngế ki ai tơdroăng xôi kân xôi rơ-iô; ‘nhiê hên tíu tơkŭm, troăng chơ, ‘măn kơtôa, tê rôe, khu ki xúa trếo ma tŭi.

Thiếu tướng Rah Lan Lâm - Ngế pơkuâ Kŏng an kong pơlê Gia Lai tối tơbleăng a hneăng hôp

Tơdroăng tơklâm rơxế hiăng hlo kơdroh a 3 tơdroăng pơkâ. Tung tơdroăng tơrŭm cheăng hbrâ mơdât pơreăng COVID-19, Kŏng an kong pơlê Gia Lai hiăng mơhnhôk rơpâu ngế kăn ƀô̆, mâu lêng pêi tơdroăng cheăng. Hơnăm 2022, Kŏng an Gia Lai tơkŭm tơbleăng tơdrêng mâu troăng rơhlâ rak  tơniăn; mơdêk tơplâ mơdât mâu ki ai xôi ing pơlê, cheăm, tơring, kong pơlê; hnê tối vâ kơdroh ki lơ ai nếo mâu ki xôi; hlối pơtối pêi tro tơdroăng hnên tối, kring vế tơniăn kuăn pơlê.

Gương tơplôu ƀă tơbleăng