VOV4.Sêdang - Hlo tơdroăng pơreăng COVID-19 tâ tú hên ó, pro ôh tá tơniăn, sap ing hơnăm 2020, On tơhrik Dak Lak hiăng mơjiâng mah QR Code tăng tơdrêng ing măng Internet troh mâu tíu xiâm rak ngăn kuăn pơlê, Cổng dịch vụ công tơnêi têa, Cổng dịch vụ công dêi kong pơlê Dak Lak, kum kuăn pơlê ối a hngêi xuân chiâng vâ pêi pro mâu tơdroăng ki kal ‘nâi ‘na on tơhrik.

Nâp liăn ƀă mah QR Cide a website cskh.cpc.vn

Ing mê, sap ing apoăng hơnăm 2021 troh nôkố, Kŏng ti hiăng tơdah xo ƀă pơkâ tơleăng lối 56 rơpâu tơdroăng ki pơkâ thế dêi mâu tơdroăng ‘na on tơhrik hŏng trăng hyôh internet, mê cho: Pro on tơhrik nếo; pơ’lêh ivá, ‘na tơdroăng ki xúa on tơhrik; pơ’lêh công tơr on tơhrik, pơ’lêh tíu kế ki riân ngăn; chêh inâi tơdroăng ki nâp liăn on tơhrik ƀă hên ki ê. Ƀă mâu tơdroăng ki kố gá ai xo liăn, tíu pêi cheăng hiăng hnê mơhno kuăn pơlê pêi pro nâp tơdrêng râ má 4.

Tiah mê, tơdroăng ki nâp liăn châ pêi pro online ing mâu tíu ki xúa ZaloPay, Momo, Payoo, Vimo lơ ing tíu ki xúa dêi hngêi rak liăn ing mah QR Code, Tíu ki nâp liăn VNPay. Tâi tâng kơxô̆ liăn hiăng nâp tung 8 khế kố nah lối 2,1 rơtal liăn.

Katarina Nga tơplôu ƀă tơbleăng