VOV4.Sêdang - Tung pơkâ pâk pơkeăng vaccine tơnêi têa hbrâ mơdât COVID-19, Kuân khu 5 châ pơcháu hnoăng tơdah, pơkuâ, pơto, xing xoăng vaccine hbrâ mơdât COVID-19 ăm 11 kong pơlê, pơlê kong kơdrâm kơpong peăng Tơdế tơnêi têa – Tây Nguyên tung kơpong Kuân khu. Mâu hâi hiăng hluâ, khu ki pơto, khu ki tiô dêi khu pơkuâ Hnôu vaccine Kuân 5 hiăng plâ hâi plâ măng, mơ-eăm pơto vaccine troh mâu kong pơlê, tơniăn tŭm tâi tâng tơdroăng. Nôkố kuân khu 5 hiăng tơdah 14 rơxế pơto vaccine, tíu tơrŭm ƀă kơbong rơxế honđa pơkuâ, séa mơnhên, séa ngăn hyôh tô tung kơthung rơxế pro hngíu, tơniăn hyôh hngíu tơtro má môi tung pơto vaccine.

Troh nôkố, Khu ki tŏng kum parŏng Kuân khu 5 hiăng tơkŭm po pơto châ tơƀrê lối 10 tâ̆n tơmeăm khăm pơlât ƀă vâ chê 300 rơpâu kung kếo vaccine troh mâu kong pơlê, pơlê kong kơdrâm peăng tơdế Tơnêi têa – Tây Nguyên. Tơdroăng ki mơ-eăm dêi khu mô đô̆i ối tung Kuân khu 5 kum thăm pêi pro tơdroăng pâk vaccine hbrâ mơdât COVID-19, khŏm mơ-eăm mơdât pơreăng kân.

A Sa Ly tơplôu ƀă tơbleăng