VOV4.Sêdang - Môi tiah mâu tơdroăng ki ngin hiăng mơ’no tối roh hdrối, klêi kơ’nâi 12 hơnăm pơkâ pêi tơdroăng tơkêa bro rơchôa, long têa kơnâ châ 4 rơpâu 400 rơtal liăn vâ pro rơchôa Krông Pač thượng, troh khế 3 pơla hdrối kố nah, kuăn pơlê ki ối tâ tá rơchôa long pơxiâm lo lăm pro pơlê nếo. Ai lối 700 rơpŏng, dâng 4 rơpâu pơ’leăng mâ mơngế kal vâ pro pơlê nếo, hnoăng cheăng ăm kuăn pơlê ki pro pơlê nếo mê cho hngăm hngo ó khât. Apoăng, mâu khu râ, kơvâ cheăng dêi tơring hiăng pơkâ kum ăm kuăn pơlê. Maluâ ti mê, xua pơreăng COVID-19 xông tâ tú hên ó, mâu khu râ cheăng athế kơjo pêi hdrối tâ cho tơdroăng hbrâ, tơplâ, mơdât pơreăng. Drêng kố, kuăn pơlê hiăng pơtối mơdêk tuăn hiâm tơrŭm môi tuăn, mơngế ki hiăng pro hngêi hdrối a pơlê nếo vêh kum ăm kuăn pơlê ki troh kơ’nâi mơdâng pro hngêi, rak vế tơdroăng tơniăn tung rêh kâ ối.

Rơpŏng jâ Ma Thị Sìn, ối a thôn 9, cheăm Čư̆ San, tơring MDrak lăm pro hngêi a pơlê nếo kơxô̆ 1, châ ing kơpong rơchôa têa Krông Pač thượng, cheăm Čư̆ Êlang, tơring Ea Kar tung pơla dế ai pơreăng COVID-19 xông tâ tú ó khât a 2 tơring, hmâ prôk lăm xuân pá, vâ vêh xuân pá. Mâu khu râ hdrối nah vâi hiăng pôu râng hnoăng cheăng kum kuăn pơlê lăm pro pơlê nếo, la nôkố hiăng tơkŭm ăm tơdroăng cheăng hbrâ, tơplâ, mơdât pơreăng. La xuân ối mơhúa, mâu rơpŏng ki pro hngêi hdrối, xua cho rơtế môi thôn, rơtế môi cheăm, thăm nếo nhŏng o ki hmâ achê dêi pó, mê vâi hiăng kum ăm rơpŏng jâ mơdâng pro hngêi ối, kơnôm tiah mê, bu kơ’nâi dâng 1 pơla măng tĭng, vâi hiăng pro klêi hngêi trăng, rơpŏng jâ hiăng tơniăn a pơlê ki nếo:

‘’Tung pơlê, vâi tŏng kum á mơdâng pro hngêi, klêi kơ’nâi lêm kuâ, vâi ting tông ‘mot mâu tơmeăm. Vâi krâ-nhŏng o hiăng tŏng kum á tiah mê cho ‘ló păng ‘nâng’’.

Kuăn pơlê lăm pro hngêi a pơlê nếo tiô tơdroăng tơkêa bro rơchôa, long têa Krông Pač thượng mơdâng hngêi tung pơla ai pơreăng COVID-19 dế xông tâ tú ó a kong pơlê Dak Lak

Pôa Vàng Seo Pa, kăn phŏ thôn pơtân a kơpong pro pơlê nếo kơxô̆ 1, cheăm Čư̆ Êlang tối ăm ngin ‘nâi, hlê nhên tơdroăng cheăng hbrâ, tơplâ, mơdât pơreăng pơla kố cho kal kân khât, tung pơla mâu khu râ dế tơvâ cheăng tơplâ, mơdât pơreăng, vâi krâ-nhŏng o tăng troăng tŏng kum dêi pó. Ai dâng 130 rơpŏng hiăng lăm pro hngêi trăng a pơlê nếo, rêm rơpŏng ăm môi lơ péa ngế, thôn ai mơjiâng 9 khu. Mâu khu ki kố hơ’lêh dêi pó lăm kum mâu rơpŏng ki pro mơdâng hngêi ối nếo, tơniăn tơdroăng rêh ối:

‘’Ngin hiăng mơjiâng 9 khu ki ting tông, mơdâng pro hngêi. Mâu rơpŏng troh pro hngêi kơ’nâi kơnôm mâu rơpŏng ki hiăng pro hngêi hdrối a pơlê nếo, mê ôh tá ai tơdroăng ki klâi pá. Tung pơla mơdâng pro hngêi mê rêm hâi xuân ai sap ing 30 troh 40 ngế, xuân hiăng pêi pro klêi, vâi hiăng lêm hngêi klêi hlối tung môi hâi, mâu hngêi hum, hngêi mơdrah mê tơná kăn rơpŏng pêi pro dêi xêh. Pơtih kơxo ah ai rơpŏng Lý Seo Cháo troh, mê ngoh Đông hiăng lăm tối ăm kăn pơkuâ khu. Kăn pơkuâ khu tối pơtâng ăm mâu ngế lo lăm veăng hlối’’.

Pôa Trần Văn Đông, Kăn phŏ Ƀơrô ngăn ‘na chiâk deăng ƀă mơnhông thôn pơlê tơring Ea Kar tối, cho kơ koan ki pơkuâ ngăn, tơdah xo kuăn pơlê lăm pro pơlê nếo, châ hơngế ing kơpong long Krông Pač thượng, tối tiah kố, tơdroăng ki kuăn pơlê kum dêi pó mơdâng pro hngêi hiăng tah lôi tơdroăng ki xahpá ăm tơring, tung pơla dế ai pơreăng xông tâ tú lâp lu tung pơlê pơla, ôh tá toh vâ ăm khu ngế ki cheăng ‘na kơvâ dêi tơring lo lăm tŏng kum ăm kuăn pơlê. Ki ahdrối tâ, tơring hiăng kum mâu khu ki mơdâng pro hngêi liăn ngân rôe têa ôu, tơmeăm ki kal, kên truâ môh rơkong vâ hbrâ mơdât pơreăng. La ƀă mâu rơpŏng ki lăm pro hngêi a pơlê nếo cho kơdrâm, ai dâng 230 rơpŏng a kơpong pơlê ki nếo kơxô̆ 1, klêi mê ai vâ chê 500 rơpŏng ki lăm pro hngêi a pơlê nếo kơxô̆ 2, tung pơle mê, pơreăng xuân pơtối ối xông tâ tú ó, Vi ƀan hnê ngăn tơring ƀă Khu hnê mơhno tơdroănag tơkêa bro dêi kong pơlê dế tơrŭm cheăng, mơjiâng troăng hơlâ kum liăn ngân, mơhá mơngế ki kum mơdâng pro hngêi. Tơdroăng kố, kô kum tơniăn ăm ivá cheăng dêi kuăn pơlê, xuân mơhnhôk vâi krâ-nhŏng o vâ tơdroăng lăm pro hngêi a pơlê nếo châ tơniăn tung pơla kố:

‘’Kơxô̆ liăn ki kum mê nôkố, Khu hnê mơhno tơdroăng tơkêa bro dêi kong pơlê dế mơjiâng, tơring kô tơkŭm po mâu roh hop vâ vêh mơnhên mâu tơdroăng mơ’no liăn ngân. Kơ’nâi mê, tâng châ kĭ ăm phep mê ngin kô xúa kơxô̆ liăn ki mê mơdrếo ăm mâu rơpŏng ki veăng kum ăm mâu rơpŏng ki nếo pro hngêi a pơlê nếo, ai 200 rơpâu liăn 1 hâi pêi cheăng’’.

Tung pơla pơreăng dế pơtối xông tâ tú ó tiah dế nôkố, tơdroăng cheăng ăm kuăn pơlê pro hngêi a pơlê nếo châ hơngế ing kơpong long Krông Pač thượng trâm hên mâu tơdroăng xahpá. La ƀă hiâm mơno tơrŭm, kuăn pơlê akố dế tŏng kum dêi pó vâ tơdroăng pro hngêi trăng a pơlê nếo khŏm rĕng châ chiâng pêi pro rĕng, vâ kô tơniăn ăm tơdroăng rêh kâ ối dêi kuăn pơlê.

Công Bắc chêh

Nhat Lisa tơplôu ƀă tơbleăng