VOV4.Sêdang - Hâi kố, lơ 28/7, Kuô̆k hô̆i hôp mơgêi hneăng hôp má môi, Kuô̆k hô̆i hneăng má 15. Hdrối mơgêi hneăng hôp, Kuô̆k hô̆i tơbleăng ăm pêi pro mâu pơkâ ‘na kĭ tơdroăng rah xo Ngế pro xiâm phŏ hnê ngăn tơnêi têa, Ngế xiâm, mâu kăn ki ê dêi Chin phuh; Pơkâ kĭ rah xo Kăn xiâm phŏ hnê ngăn tơnêi têa ƀă Mâu kăn cheăng tung Hô̆i đong cheăng lêng ƀă gâk kring; tơbleăng ăm pêi pro pơkâ ‘na kĭ tơdroăng rah xo mâu kăn pêi cheăng tung Hngêi tơleăng xiâm. Kuô̆k hô̆i xuân têk kŏng môi tuăn tơbleăng ăm pêi pro Pơkâ ‘na kĭ mơgêi tơdroăng mơ’no hrê liăn ngân tơnêi têa hơnăm 2019.

Pơkâ ‘na mơ’no liăn ngân 5 hơnăm tơnêi têa hneăng hơnăm 2021 – 2025. Pơkâ ‘na troăng hơlâ mơ’no liăn cheăng Tơdroăng pơkâ xiâm tơnêi têa kơdroh kơtiê krá tơniăn hneăng hơnăm 2021 – 2025. Pơkâ ‘na troăng hơlâ mơ’no liăn pêi pro Tơdroăng pơkâ xiâm tơnêi têa mơjiâng thôn pơlê nếo hneăng hơnăm 2021 – 2025 ƀă Pơkâ ‘na mơ’no liăn cheăng iâ khế hneăng hơnăm 2021 – 2025.

Mơ’nui peăng kơxê ki mê, Kuô̆k hô̆i hôp pa kong, hiăng têk kŏng môi tuăn tơbleăng ăm pêi pro 3 Pơkâ ki kal mê cho: Pơkâ ‘na pêi mơnhông cheăng kâ – rêh ối pơlê pơla 5 hơnăm 2021 – 2025. Pơkâ ‘na Tơdroăng mơjiâng luât, luât hơnăm 2022, ‘mâi rơnêu Tơdroăng mơjiâng luât, luât hơnăm 2021. Pơkâ ‘na tơdroăng mơjiâng khu râ kăn séa ngăn tơdroăng vâ pêi pro dêi Kuô̆k hô̆i hơnăm 2022. Ki tơtrŏng má môi, hơnăm 2022, Kuô̆k hô̆i kô séa ngăn, tơpui tối ‘mâi rơnêu Luât tơnêi tíu.

A Sa Ly tơplôu ƀă tơbleăng